అమరావతి బహుజన ఐకాస అధ్యక్షుడు పోతుల బాలకోటయ్య

విజయవాడ(గాంధీనగర్‌), న్యూస్‌టుడే: అమరావతే రాజధాని అని న్యాయస్థానాలు చెప్పినా.. జగన్‌ బుద్ధి మారలేదని అమరావతి బహుజన ఐకాస అధ్యక్షుడు పోతుల బాలకోటయ్య మండిపడ్డారు. వైకాపా మళ్లీ అధికారంలోకి వస్తే విశాఖే రాజధాని అంటూ ఆ పార్టీ మ్యానిఫెస్టోలో పెట్టడం దీనికి నిదర్శనమన్నారు. విజయవాడ ప్రెస్‌క్లబ్‌లో శనివారం ఆయన విలేకరులతో మాట్లాడారు. జగన్‌ ప్రాంతీయవాదాన్ని ప్రోత్సహిస్తూ.. రాష్ట్రాన్ని విభజించేందుకూ వెనుకాడటం లేదని విమర్శించారు. రాబోయే ఎన్నికల్లో వైకాపాని గద్దె దించకపోతే రాష్ట్ర భవిష్యత్తు ప్రశ్నార్థకంగా మారుతుందని హెచ్చరించారు. మహిళా ఐకాస నాయకురాలు రాయపాటి శైలజ మాట్లాడుతూ.. అమరావతిని రక్షించుకునేందుకు ప్రతి ఒక్కరూ తమ  ఓటు హక్కు వినియోగించుకోవాలని పిలుపునిచ్చారు. అనంతరం రాజధాని పోరాటంలో ప్రాణాలు కోల్పోయిన రైతుల చిత్రాలను ప్రదర్శించారు.  నాయకులు నాగేంద్ర, శ్రీనివాసరావు, గాంధీ, తదితరులు పాల్గొన్నారు.