ఓటుహక్కుతోనే బుద్ధి చెబుదాం
కైకలూరు సభలో సినీరచయిత విజయేంద్రప్రసాద్‌

మండవల్లి, కైకలూరు, న్యూస్‌టుడే: రాష్ట్రాన్ని అడ్డగోలుగా దోచుకు తినే కాలకేయులను తరిమికొట్టేందుకు ప్రతి ఒక్కరూ కృషిచేయాలని రాజ్యసభ సభ్యుడు, ప్రముఖ సినీ రచయిత కేవీ విజయేంద్రప్రసాద్‌ పిలుపునిచ్చారు. ఏలూరు జిల్లా కైకలూరులో కూటమి అభ్యర్థి కామినేని శ్రీనివాస్‌, ఏలూరు లోక్‌సభ అభ్యర్థి పుట్టా మహేశ్‌కుమార్‌ యాదవ్‌కు మద్దతుగా ఆటపాక నుంచి లోకుమూడి వరకు సోమవారం ర్యాలీ నిర్వహించారు. అనంతరం కైకలూరులోని సీఎన్‌ఆర్‌ కల్యాణవేదికలో నిర్వహించిన ఆత్మీయ సమావేశంలో ఆయన మాట్లాడారు. కష్టపడి పనిచేసి రాష్ట్రాన్ని, దేశాన్ని ముందుకు తీసుకెళ్లేవారినే ఎన్నుకోవాలని సూచించారు. మోదీ, చంద్రబాబు, పవన్‌కల్యాణ్‌ ఎంతో అద్భుతమైన పాలనను అందిస్తారని ఆశాభావం వ్యక్తం చేశారు. రానున్న ఐదేళ్లలో కైకలూరుకు కామినేని నాయకత్వంలో మహర్దశ పడుతుందని జోస్యం చెప్పారు.