ఈనాడు డిజిటల్‌, అమరావతి: రాష్ట్రంలో జగన్‌ రాక్షసపాలనను అంతం చేయడానికి ఎన్డీయేకు భేషరతుగా మద్దతు తెలుపుతున్నట్టు నవతరం పార్టీ అధ్యక్షుడు రావు సుబ్రహ్మణ్యం తెలిపారు. తమ పార్టీ పోటీ చేస్తున్న ఆరు అసెంబ్లీ, నాలుగు లోక్‌సభ నియోజకవర్గాల్లో ఎన్డీయేకి ఓటెయ్యాలని ప్రచారం చేయనున్నట్లు వెల్లడించారు. ఈ ప్రభుత్వంలో నష్టపోని వర్గం లేదని ధ్వజమెత్తారు. మంగళగిరిలోని తెదేపా కేంద్ర కార్యాలయంలో ఆ పార్టీ పొలిట్‌బ్యూరో సభ్యుడు వర్ల రామయ్యతో కలిసి రావు సుబ్రహ్మణ్యం మంగళవారం విలేకరులతో మాట్లాడారు. ‘‘మా పార్టీ అభ్యర్థులు కొందరికి గాజు గ్లాసు గుర్తును ఈసీ కేటాయించింది. వైకాపా ప్రభుత్వ వ్యతిరేక ఓటు చీలకూడదనే ఉద్దేశంతోనే పోటీ నుంచి విరమించుకుంటున్నాం. రాష్ట్రానికి చంద్రబాబు పాలన, కేంద్రం సహకారం, పవన్‌కల్యాణ్‌ లాంటి ప్రజాసేవకుడు అవసరం’’ అని తెలిపారు. తెదేపా అధినేత చంద్రబాబు ఆదేశాల మేరకు నవతరం పార్టీ మద్దతును స్వాగతిస్తున్నట్లు వర్ల రామయ్య పేర్కొన్నారు.