సీపీఐ జాతీయ కార్యదర్శి నారాయణ

విజయవాడ(అలంకార్‌కూడలి), న్యూస్‌టుడే: రూ.వంద కోట్ల అవినీతి చేసిన వారిని జైలులో పెడుతున్నారని, రూ.45 వేల కోట్ల అవినీతి చేసిన వారు బెయిల్‌పై బయట ఉంటున్నారని సీపీఐ జాతీయ కార్యదర్శి నారాయణ అన్నారు. బుధవారం ఆయన విజయవాడలో విలేకరులతో మాట్లాడారు. రూ.15 లక్షల కోట్ల అవినీతి చేసిన వారు విదేశాల్లో హాయిగా ఉంటున్నారని, మోదీకి, భాజపాకు వ్యతిరేకంగా మాట్లాడేవారిని ఈడీ, ఐటీ, సీబీఐ వంటి సంస్థల ద్వారా బెదిరిస్తున్నారని ఆరోపించారు. కేజ్రీవాల్‌, హేమంత్‌ సోరెన్‌లను జైలులో పెట్టారని, తెలంగాణ ముఖ్యమంత్రి రేవంత్‌రెడ్డిపై కేసు నమోదు చేశారని పేర్కొన్నారు. అధికార దుర్వినియోగం జరగకుండా యంత్రాంగానికి తగిన సూచనలు చేయాలని ఈసీకి లేఖ రాసినట్లు ఆయన వెల్లడించారు.