Tiger: బెంగాల్‌లో అదృశ్యం.. బంగ్లాదేశ్‌లో ప్రత్యక్షం

నదులు, దీవులు దాటుకొని 100 కి.మీ. ప్రయాణించిన పులి

ఈనాడు, దిల్లీ: పశ్చిమ బెంగాల్‌ అడవుల్లో నుంచి ఓ మగ పులి అదృశ్యమైంది. నాలుగు నెలల తర్వాత పొరుగు దేశమైన బంగ్లాదేశ్‌ అడవుల్లో ప్రత్యక్షమైంది. అక్కడకు చేరుకోవడానికి సుమారు 100 కి.మీ. ప్రయాణించిన ఈ వ్యాఘ్రం.. ఆ క్రమంలో నాలుగుకు పైగా నదులను, మూడు దీవులను దాటేసింది! అయితే ఎక్కడా మనుషుల ఆవాసాల్లోకి చొరబడలేదు. పులి మెడకు అమర్చిన రేడియో ట్యాగింగ్‌ పరికరం వల్ల దాని ఆచూకీ తెలిసినట్లు అధికారులు వెల్లడించారు. పశ్చిమ బెంగాల్‌లోని సుందర్బన్స్‌ చిట్టడవుల్లో కనిపించిన ఆ పులికి గతేడాది డిసెంబరులో అటవీ అధికారులు రేడియో ట్యాగింగ్‌ పరికరాన్ని అమర్చారు. పులుల కదలికలపై నిఘా పెట్టేందుకే ఈ ఏర్పాటు చేశారు. దాని ద్వారా ఆ పులి ఎక్కడున్నదీ తెలుసుకోవచ్చు. అంతేకాదు.. ఆ పులి మరణిస్తే ఆ విషయాన్ని పసిగట్టి తెలియజేసే ఓ ప్రత్యేక సెన్సర్‌ను అందులో ఏర్పాటు చేశారు. ఆ తర్వాత ఆ ప్రాంతం నుంచి వెళ్లిపోయిన ఆ పులి బంగ్లాదేశ్‌ వైపు బయల్దేరింది. గత నెల 11న అది బంగ్లాదేశ్‌లోని తల్‌పాట్టి దీవిలో ఉన్నట్లు సంకేతాలు అందాయి. ఆ తర్వాత రేడియో ట్యాగింగ్‌ పరికరం పనిచేయడం ఆగిపోయింది. అది ఎక్కడైనా పడిపోయి ఉండొచ్చని అధికారులు భావిస్తున్నారు. చివరకు ఆ పులి బంగ్లాదేశ్‌లోని సుందర్బన్స్‌ అడవుల్లో ఉన్నట్లు అధికారులు కనిపెట్టారు. అయితే అది గతంలో అక్కడి నుంచే బెంగాల్‌ అడవుల్లోకి వచ్చి ఉండొచ్చని, అందుకే తిరిగి వెళ్లి ఉండొచ్చని చెబుతున్నారు.