Satyapal Malik: సత్యపాల్‌ మాలిక్‌ ఇంటికి సీబీఐ.. 5 గంటలపాటు విచారణ..!

దిల్లీ: జమ్మూ- కశ్మీర్‌ (Jammu Kashmir) మాజీ గవర్నర్‌ సత్యపాల్‌ మాలిక్‌ (Satyapal Malik)ను సీబీఐ (CBI) విచారించింది. ఓ బీమా పథకం ఒప్పందంలో అవినీతి (Insurance Scam) చోటుచేసుకుందని జమ్మూ- కశ్మీర్‌ గవర్నర్‌గా ఉన్న సమయంలో ఆయన ఆరోపణలు చేసిన విషయం తెలిసిందే. ఈ నేపథ్యంలోనే ఆ కేసుకు సంబంధించి వివరణ కోసం ఏప్రిల్ 28న విచారణ చేపడతామంటూ సీబీఐ ఇటీవల ఆయనకు నోటీసులు జారీ చేసింది.

ఈ క్రమంలోనే సీబీఐ బృందం శుక్రవారం ఉదయం 11.45 గంటల సమయంలో దిల్లీలోని మాలిక్‌ నివాసానికి చేరుకుంది. ఈ కేసులో సాక్షిగా దాదాపు 5 గంటలపాటు ఆయన్ను విచారించి, స్టేట్‌మెంట్‌ రికార్డు చేసినట్లు సమాచారం. ప్రస్తుతానికి ఆయన ఈ కేసులో నిందితుడు, అనుమానితుడు కాదని సీబీఐ తెలిపింది. ఈ కేసులో మాలిక్‌ను సీబీఐ విచారించడం ఏడు నెలల వ్యవధిలో ఇది రెండోసారి. గత ఏడాది అక్టోబర్‌లో ఒకసారి ఆయన వాంగ్మూలాన్ని నమోదు చేసుకుంది. పుల్వామా దాడి ఘటనపై మాలిక్‌ ఇటీవల కేంద్రంపై సంచలన ఆరోపణలు చేసిన క్రమంలో ఈ విచారణ జరగడం ప్రాధాన్యం సంతరించుకుంది.

సత్యపాల్‌ మాలిక్‌ 2018లో జమ్మూ- కశ్మీర్‌ గవర్నర్‌గా ఉన్న సమయంలో.. రాష్ట్ర ప్రభుత్వ ఉద్యోగులు, వారి కుటుంబాల కోసం ఉద్దేశించిన వైద్య బీమా పథకంతోపాటు కిరు జలవిద్యుత్ ప్రాజెక్టులో సివిల్ వర్క్ కాంట్రాక్టుల విషయంలో అవినీతి జరిగిందని ఆరోపించారు. ఈ ఫైళ్లను క్లియర్‌ చేసేందుకు రూ.300 కోట్ల లంచం ఇవ్వజూపారని పేర్కొన్నారు. వీటిపై గతేడాది ఏప్రిల్‌లో సీబీఐ వేర్వేరుగా కేసులు నమోదు చేసింది. ఈ క్రమంలోనే బీమా పథకం కేసులో తాజాగా ఆయన్ను మరోసారి ప్రశ్నించింది.