Traffic Rules: పోలీసులే ట్రాఫిక్‌ రూల్స్‌ ఉల్లంఘించారా.. డబుల్‌ ఫైన్‌!

జైపుర్‌: రోడ్డు నిబంధనలు (Traffic Rules) ఉల్లంఘించే సాధారణ ప్రయాణికులపై ట్రాఫిక్‌ సిబ్బంది కఠిన చర్యలు తీసుకోవడం తెలిసిందే. పెద్ద మొత్తంలో జరిమానాలు (Fine) వసూలు చేస్తుంటారు. మరి.. ట్రాఫిక్స్‌ రూల్స్‌ పాటించాలని ప్రజలకు చెప్పాల్సిన పోలీసులే (Police) వాటిని అతిక్రమిస్తే..? ఇలాంటి ఉల్లంఘనలను కట్టడి చేసేందుకు రాజస్థాన్‌ (Rajasthan) ప్రభుత్వం కీలక నిర్ణయం తీసుకుంది. ఇకపై ట్రాఫిక్ నిబంధనలను పాటించని పోలీసులకు రెట్టింపు జరిమానా విధించనుంది. దీంతోపాటు వారిపై శాఖాపరమైన చర్యలు తీసుకుంటామని హెచ్చరించింది. 

రాజస్థాన్‌ డీజీపీ ఉమేశ్‌ మిశ్రా ఆదేశాల మేరకు ఏడీజీపీ (ట్రాఫిక్) వీకే సింగ్ మంగళవారం ఈ మేరకు ఆదేశాలు జారీ చేశారు. శిరస్త్రాణం ధరించకపోవడం, ద్విచక్ర వాహనంపై ఇద్దరి కంటే ఎక్కువ మంది ప్రయాణించడం, కారు నడుపుతున్నప్పుడు సీటు బెల్టు పెట్టుకోకపోవడం, సిగ్నల్‌ జంపింగ్‌, మోతాదుకు మించి మద్యం తాగి వాహనాలు నడపడం తదితర అతిక్రమణల విషయంలో పోలీసులు.. సాధారణ జరిమానా కంటే రెట్టింపు మొత్తాన్ని చెల్లించాల్సి ఉంటుంది. భవిష్యత్తులో ఇలాంటివి పునరావృతం కాకుండా సంబంధిత పోలీసులపై శాఖాపరమైన చర్యలూ తీసుకుంటారు.