Drugs: ₹135 కోట్ల విలువైన డ్రగ్స్‌ సీజ్‌.. తొమ్మిది మంది అరెస్టు!

ముంబయి: మహారాష్ట్రలోని ముంబయిలో అంతర్జాతీయ డ్రగ్స్‌ ముఠా గుట్టు రట్టైంది. ఎన్సీబీ అధికారులు దాదాపు రూ.135కోట్ల విలువ చేసే మాదకద్రవ్యాలను సీజ్‌ చేశారు. డ్రగ్స్‌ అక్రమ రవాణా వ్యవహారంలో ముగ్గురు విదేశీయులు సహా మొత్తం తొమ్మిది మందిని అరెస్టు చేసినట్లు ఎన్సీబీ అధికారులు వెల్లడించారు. సీజ్‌ చేసిన డ్రగ్స్‌లో 6.9కిలోల కొకైన్‌, 200 కిలోల అల్ప్రాజోలం ఉన్నట్టు తెలిపారు. దక్షిణ ముంబయిలోని ఖేత్‌వాడీ ప్రాంతంలో ఓ హోటల్‌లో ఇద్దరు బొలీవియన్‌ మహిళల్ని అరెస్టు చేసిన ఎన్సీబీ అధికారులు.. వారి లోదుస్తులు, టూత్‌పేస్ట్‌, బట్టలు, కాస్మోటిక్‌ ట్యూబ్‌లు, సబ్బులు, పాదరక్షలు, మేకప్‌కిట్‌లలో దాచి ఉంచిన ఐదు కిలోల కొకైన్‌ను స్వాధీనం చేసుకున్నారు. ఈ డ్రగ్స్‌ను వారు పొడి, లిక్విడ్‌, పేస్ట్‌ రూపాల్లో ఆయా వస్తువుల్లో దాచి ఉంచారని ఎన్సీబీ డిప్యూటీ డైరెక్టర్‌ జనరల్‌ సంజయ్‌ కుమార్‌ సింగ్‌ వెల్లడించారు. బ్రెజిల్‌లోని సావోపాలో కేంద్రంగా పనిచేస్తోన్న ముఠా వీరిద్దరినీ డ్రగ్స్‌తో భారత్‌కు పంపిందని అధికారులు తెలిపారు. అలాగే, పలుచోట్ల జరిపిన దాడుల్లో మరికొందరిని అదుపులోకి తీసుకొని మాదకద్రవ్యాలను సీజ్‌ చేసినట్టు చెప్పారు.