Dhamaka: స్పెయిన్‌లో ‘ధమాకా’ పాట

రవితేజ కథానాయకుడిగా త్రినాథరావు నక్కిన దర్శకత్వంలో తెరకెక్కుతున్న చిత్రం ‘ధమాకా’. డబుల్‌ ఇంపాక్ట్‌.. అనేది ఉపశీర్షిక. శ్రీలీల కథానాయిక. టి.జి.విశ్వప్రసాద్‌ నిర్మాత. ఈ సినిమాలోని పాటల చిత్రీకరణ కోసం స్పెయిన్‌ వెళ్లింది చిత్రబృందం. అక్కడి చారిత్రక ప్రాంతమైన ప్లాజా డి ఎస్పానాలో రవితేజ, శ్రీలీలపై ఓ రొమాంటిక్‌ గీతాన్ని తెరకెక్కిస్తున్నట్టు సినీవర్గాలు తెలిపాయి. ‘‘యాక్షన్‌, వినోదం మేళవింపుగా రూపొందుతున్న చిత్రమిది. ఇటీవలే హైదరాబాద్‌లో రామ్‌ లక్ష్మణ్‌ నేతృత్వంలో కీలకమైన పోరాట ఘట్టాల్ని తెరకెక్కించాం. ఇందులోని ఓ రొమాంటిక్‌ పాటకి స్పెయిన్‌లోని అందమైన ప్రదేశాల్ని ఎంచుకుని చిత్రీకరణ చేస్తున్నాం. ప్రాంతీయ వాస్తు శిల్పంతో కూడిన ప్లాజా డి ఎస్పానాలో తెరకెక్కిస్తున్న పాట చిత్రానికి ప్రధాన ఆకర్షణగా నిలుస్తుంద’’ని చిత్రబృందం తెలిపింది. ఈ చిత్రానికి కథ, స్క్రీన్‌ప్లే: ప్రసన్నకుమార్‌ బెజవాడ, సంగీతం: భీమ్స్‌, ఛాయాగ్రహణం: కార్తీక్‌ ఘట్టమనేని, సహనిర్మాత: వివేక్‌ కూచిభొట్ల.

రవితేజతో నివేదా

చిరంజీవి 154వ సినిమాలో రవితేజ ఓ కీలక పాత్ర చేస్తున్న సంగతి తెలిసిందే. బాబీ దర్శకత్వంలో తెరకెక్కుతున్న ఈ చిత్రంలో చిరంజీవి సరసన శ్రుతిహాసన్‌ నటిస్తోంది. రవితేజకు జోడీగా నివేదా పేతురాజ్‌ని ఎంపిక చేసినట్టు సమాచారం. ఆసక్తికరమైన కలయికలో రూపొందుతున్న ఈ చిత్రాన్ని మైత్రీ మూవీ మేకర్స్‌ నిర్మిస్తోంది.