‘గమనం’.. చాలా ప్రత్యేకం

శ్రియ, ప్రియాంక జవాల్కర్‌, శివ కందుకూరి, నిత్యామేనన్‌ ప్రధాన పాత్రల్లో సుజనా రావు తెరకెక్కించిన బహు భాషా చిత్రం ‘గమనం’. రమేష్‌ కరుటూరి, వెంకీ పుషదపు, జ్ఞానశేఖర్‌ వి.ఎస్‌ నిర్మించారు. ఇళయరాజా స్వరాలందించారు. ఈ సినిమా త్వరలో ప్రేక్షకుల ముందుకు రానుంది. ఈ నేపథ్యంలోనే గురువారం హైదరాబాద్‌లో విలేకర్ల సమావేశం నిర్వహించారు. ఈ సందర్భంగా శ్రియ మాట్లాడుతూ ‘‘సుజనా రావు గుండె లోతుల్లో నుంచి వచ్చిన కథతో రూపొందిన చిత్రమిది. ఇందులో నేను భాగమైనందుకు సంతోషంగా ఉంది’’ అంది. ‘‘సుజనా కథ చెప్తున్నప్పుడే ఈ చిత్రానికి నేను రాయాలి అనిపించింది. ప్రతి ఫ్రేమ్‌లో ఆమె తపన కనిపిస్తుంది’’ అన్నారు సాయిమాధవ్‌ బుర్రా. ‘‘మనం ఏ కథ చెప్పినా దానికి ఓ చక్కటి అర్థం ఉండాలి. అలాంటి మంచి కథతో తెరకెక్కిన చిత్రమే మా ‘గమనం’. ఇళయరాజా సర్‌కు కథ వినిపించాక.. ‘లే.. లేచి నిలబడు’ అన్నారు. నాకు భయం వేసింది. తర్వాత ఫొటో తీసుకుని మనం సినిమా చేస్తున్నాం అన్నారు.’’ అని తెలిపారు సుజనా రావు. కార్యక్రమంలో శివ కందుకూరి, బాబా తదితరులు పాల్గొన్నారు.