Nagarjuna: ఒకేచోట కలిసిన సౌత్‌ సెలబ్రిటీలు.. నటుడి పాటకు నాగ్‌ ఫిదా

ఇంటర్నెట్‌డెస్క్‌: సినిమాలు, షోలు మాత్రమే కాకుండా పలు వాణిజ్య ప్రకటనలకూ ప్రచారకర్తగా వ్యవహరిస్తున్నారు అగ్ర కథానాయకుడు నాగార్జున. పేరు పొందిన ఓ జ్యువెల్లరీ షోరూమ్‌కు ఆయన ప్రచారకర్తగా వ్యవహరిస్తోన్న విషయం తెలిసిందే. దసరా వేడుకల్లో భాగంగా తమ బ్రాండ్‌కు అంబాసిడర్లుగా పనిచేస్తోన్న సెలబ్రిటీలందరి కోసం ఆ సంస్థ ప్రత్యేకంగా ఓ కార్యక్రమాన్ని ఏర్పాటు చేసింది. నాగార్జున, ప్రభు, ప్రియా ప్రకాశ్‌ వారియర్‌, స్నేహా, ఆమె భర్త ప్రసన్నతోపాటు కర్ణాటక, కేరళ, ముంబయికు చెందిన పలువురు తారలు ఇందులో పాల్గొన్నారు.

ఎంతో సందడిగా సాగిన ఈ వేడుకల్లో తన గానంతో అలరించారు నటుడు జయరాం. ప్రభు నటించిన ‘చిన్నతంబి’, నాగార్జున ‘గీతాంజలి’ చిత్రాల్లోని పాటలను ఆలపించి సెలబ్రిటీల మది గెలుచుకున్నారు. అనంతరం దివంగత నటుడు పునీత్‌ రాజ్‌కుమార్‌ను గుర్తుచేసుకుంటూ ‘రాజకుమారా’ పాట పాడారు. ఇటీవల విడుదలైన ఈ వీడియోపై నాగార్జున స్పందిస్తూ.. జయరాంకు ధన్యవాదాలు చెప్పారు. అద్భుతంగా పాడారని చెప్పారు. నాగ్‌ ట్వీట్‌తో ఈ వీడియో నెటిజన్ల దృష్టిని ఆకర్షిస్తోంది.