Chiranjeevi: చిరు సినిమాలో?

కొత్త అవకాశాల విషయంలో గట్టి పోటీనిస్తోంది కేథరిన్‌. ‘మాచర్ల నియోజకవర్గం’, ‘భళా తందనాన’తోపాటు పలు చిత్రాల్లో నటిస్తోందామె. తాజాగా చిరంజీవి సినిమా విషయంలోనూ ఆమె పేరు ప్రముఖంగా వినిపిస్తోంది. చిరంజీవి కథానాయకుడిగా... బాబీ దర్శకత్వంలో ఓ చిత్రం తెరకెక్కుతున్న సంగతి తెలిసిందే. శ్రుతిహాసన్‌ కథానాయిక. ఇందులో మరో ప్రముఖ హీరో, హీరోయిన్‌ సందడి చేస్తారు. హీరోగా రవితేజ పేరు ఖరారైనట్టు తెలుస్తోంది. ఆయనకి జోడీగా నటించే కథానాయిక ఎంపిక విషయంలోనే కొన్ని రోజులుగా కసరత్తులు జరుగుతున్నాయి. ఆ పాత్ర కోసం ఇటీవల కేథరిన్‌ని సంప్రదించినట్టు సమాచారం. హీరో, హీరోయిన్‌ జోడీపై చిత్రబృందం అధికారికంగా స్పందించాల్సి ఉంది.