Ajith Kumar: చికిత్స తర్వాత ఇంటికి చేరుకున్న నటుడు అజిత్‌

చెన్నై: ప్రముఖ నటుడు అజిత్‌ కుమార్‌(Ajith Kumar) ఆస్పత్రి నుంచి డిశ్ఛార్జ్‌ అయ్యారు. కొన్ని రోజులు విశ్రాంతి తీసుకోవాలని వైద్యులు సూచించారు. ఇటీవల ఆయన చెన్నై అపోలో ఆస్పత్రిలో చేరారు. దీనికి సంబంధించిన వీడియో బయటకి రావడంతో అజిత్‌ ఆరోగ్యంపై వివిధ రకాల వార్తలు ప్రచారం అయ్యాయి. దీంతో అభిమానుల్లో ఆందోళన నెలకొంది. ఈ వార్తలపై అజిత్‌ పీఆర్వో సురేశ్‌చంద్ర వివరణ ఇచ్చారు. ‘‘సాధారణ వైద్య పరీక్షల కోసం అజిత్‌ ఆస్పత్రిలో చేరారు. పరీక్షలు నిర్వహించిన వైద్యులు చెవి వెనక ఉన్న నరాలు బలహీనంగా ఉన్నాయని తెలిపి వాటికి చికిత్స చేశారు. ప్రస్తుతం ఆయన ఆరోగ్యం బాగానే ఉంది. ఆస్పత్రి నుంచి తిరిగి ఇంటికి చేరుకున్నారు. ఇప్పటివరకూ ఆయన ఆరోగ్యంపై వచ్చిన వార్తల్లో నిజం లేదు. ఇలాంటి తప్పుడు వార్తలు ప్రచారం చేయడం సరికాదు. దయచేసి ఇలా చేయొద్దని’’ ఎక్స్‌లో పోస్ట్‌ పెట్టారు. అజిత్‌ ఆరోగ్యంపై స్పష్టత రావడంతో అభిమానులు ఊపిరి పీల్చుకున్నారు.

మాగిజ్‌ తిరుమేని దర్శకత్వంలో అజిత్‌ ‘విదా ముయార్చి’ చిత్రంలో నటిస్తున్నారు. యాక్షన్‌ ఎంటర్‌టైనర్‌గా దీనిని రూపొందిస్తున్నారు. ఇందులో త్రిష కథానాయిక.