అజయ్‌ దేవగణ్‌ ‘సైతాన్‌’ సెన్సార్‌ బోర్డు ఏం చెప్పిందంటే?

ఇంటర్నెట్‌ డెస్క్‌: అజయ్‌ దేవగణ్‌ (Ajay Devgn), జ్యోతిక (Jyotika), ఆర్‌.మాధవన్‌ (R.Madhavan) కీలక పాత్రల్లో నటించిన చిత్రం ‘సైతాన్‌’. ఈ సినిమాను వికాస్‌ బహ్ల్‌ తెరకెక్కించారు. 25 ఏళ్ల తర్వాత జ్యోతిక బాలీవుడ్‌లో చేస్తున్న సినిమా కావడంతో హిందీ చిత్ర పరిశ్రమలో భారీ అంచనాలు నెలకొన్నాయి. ఇటీవల విడుదలైన ట్రైలర్‌, టీజర్‌ ప్రేక్షకులను ఆకట్టుకున్నాయి. విడుదలకు సిద్ధంగా ఉన్న ఈ సినిమాలో కొన్ని మార్పులు చేయాలంటూ సెన్సార్‌ బోర్డ్‌ ఆదేశించింది. ఈ సినిమా బ్లాక్‌ మ్యాజిక్‌ను సపోర్ట్‌ చేస్తూ రూపొందించింది కాందంటూ వాయిస్‌ ఓవర్‌లో తెలియజేయాలని సూచించింది. దీనితోపాటు కొన్ని సన్నివేశాల నిడివి 25 నిమిషాలు తగ్గించాలని, అభ్యంతరకరమైన పదాలను మార్చాలంటూ కోరింది.  ఈ మార్పులు చేసిన తర్వాత సినిమా రన్‌ టైమ్‌ 2:12 గంటలు ఉంటుందని చిత్రవర్గాల సమాచారం. 

హారర్‌ థ్రిల్లర్‌గా జియో స్టూడియోస్‌, అజయ్‌ దేవగణ్‌ ఫిల్మ్‌, పనోరమా స్టూడియోస్‌ సంయుక్తంగా ఈ సినిమాను నిర్మిస్తున్నాయి. ఇందులో ఆర్‌.మాధవన్‌ నెగిటివ్‌ షేడ్‌లో కనిపించనున్నారు. ఈ సినిమా మార్చి 8న విడుదల కానుంది. సరదాగా సాగిపోతున్న కుటుంబంలోకి అనుకోని అతిథి ప్రవేశిస్తాడు. అతని కారణంగా ఆ కుటుంబం ఎలాంటి సమస్యలు ఎదుర్కొంది. అందులోంచి వారెలా బయటపడ్డారన్న అంశాలతో కథనం సాగుతుంది. ఈ సినిమా ప్రేక్షకులను కచ్చితంగా థ్రిల్ల్‌ చేస్తుందని జ్యోతిక ఇటీవల ఓ ఇంటర్వ్యూలో తెలిపారు.