Chiranjeevi: నేను సక్సెస్‌ఫుల్‌ హీరో కావడానికి ఆమే కారణం: చిరంజీవి

హైదరాబాద్‌: తాను విజయవంతమైన హీరోగా ఉండటానికి ప్రధాన కారణం తన సతీమణి సురేఖ అని ప్రముఖ కథానాయకుడు చిరంజీవి అన్నారు. తన సినిమాలపై వందశాతం దృష్టి పెట్టడానికి ఆమె సహకారం ఎంతో ఉందని చెప్పారు. మహిళా దినోత్సవం సందర్భంగా నగరంలోని చిరంజీవి బ్లడ్‌ బ్యాంక్‌లో సంబరాలు నిర్వహించారు. సినీ పరిశ్రమలోని పలువురు మహిళా కార్మికులకు చిరంజీవి దంపతులు సన్మానం చేశారు. అనంతరం చిరంజీవి మాట్లాడారు.

కుటుంబంలో మహిళకు ఎన్నో బాధ్యతలు ఉంటాయని.. చిన్నతనంలో తన తల్లి ఎంతో కష్టపడేవారని ఆయన గుర్తు చేసుకున్నారు. నేటి మహిళలు చంద్రమండలం, ఒలింపిక్స్‌ స్థాయికి ఎదుగుతున్నారని చెప్పారు. మహిళా సాధికారత కోసం అందరూ కృషి చేయాలన్నారు. ప్రతి ఇంట్లో అమ్మ, సోదరి సాధికారత కోసం పాటుపడాలన్నారు. ప్రపంచం గర్వించే స్థాయిలో స్త్రీ శక్తి ఉండాలని చిరంజీవి ఆకాంక్షించారు.