భూగోళమే పెంచే వేగమే.. నిన్ను నన్ను కలిపేందుకే

‘‘ఆకాశమే తలే ఎత్తెనే.. నా ప్రేమ కొలిచేందుకే. భూగోళమే పెంచే వేగమే.. నిన్ను నన్ను కలిపేందుకే’’ అంటూ ప్రేమ పాటలు పాడుకుంటున్నారు నాగశౌర్య. ఆయన కథానాయకుడిగా సంతోష్‌ జాగర్లపూడి తెరకెక్కించిన క్రీడా నేపథ్య చిత్రం ‘లక్ష్య’. నారాయణ్‌ దాస్‌.కె నారంగ్‌, పుస్కర్‌ రామ్‌మోహన్‌ రావు, శరత్‌ మరార్‌ సంయుక్తంగా నిర్మించారు. కేతిక శర్మ కథానాయిక. జగపతిబాబు కీలక పాత్రలో నటించారు. ఈ సినిమా ఈనెల 10న   విడుదల కానుంది. ఈ నేపథ్యంలోనే శనివారం హైదరాబాద్‌లో ‘‘సయా సయా..’’ అనే గీతాన్ని విడుదల చేశారు. ఈ పాటకు కాల భైరవ స్వరాలు సమకూర్చగా.. కృష్ణకాంత్‌ సాహిత్యమందించారు. జునైద్‌ కుమార్‌ ఆలపించారు. పాటలో శౌర్య, కేతికల జోడీ చూడముచ్చటగా కనిపించింది. ఈ సినిమాకి కూర్పు: జునైద్‌, ఛాయాగ్రహణం: రామ్‌ రెడ్డి.