ఇప్పుడు ర్యాంప్‌ షోకి సిద్ధం

కొద్దిరోజుల కిందట షూటింగ్‌లో తీవ్రంగా గాయపడ్డ బాలీవుడ్‌ సీనియర్‌ నటుడు అమితాబ్‌ బచ్చన్‌ ప్రస్తుతం పూర్తిస్థాయిలో కోలుకున్నానంటూ సోమవారం సామాజిక మాధ్యమాల ద్వారా తెలిపారు. ర్యాంప్‌ షో చేస్తున్న పాత ఫొటోని ఇన్‌స్టాలో పంచుకుంటూ.. మళ్లీ ఫ్యాషన్‌ షో పాల్గొనడానికి సిద్ధమయ్యానన్నారు. ఈ సందర్భంగా ‘నేను త్వరగా కోలుకోవాలని ప్రార్థించిన అందరికీ కృతజ్ఞతలు’ అని పేర్కొన్నారు. ‘హైదరాబాద్‌లో జరుగుతున్న ‘ప్రాజెక్ట్‌ కె’ షూటింగ్‌లో తీవ్రంగా గాయపడ్డాను. పక్కటెముక విరిగినట్టు వైద్యులు చెప్పారు. కండరాలు పట్టేయడంతో భరించలేనంత నొప్పిగా ఉంది’ అంటూ మార్చి 5న తన బ్లాగులో రాసుకొచ్చారు బిగ్‌ బీ. ప్రభాస్‌, దీపిక పదుకొణెలు నాయకానాయికలుగా నాగ్‌అశ్విన్‌ తెరకెక్కిస్తున్న ‘ప్రాజెక్ట్‌ కె’లో అమితాబ్‌ కీలక పాత్ర పోషిస్తున్నారు.