భయపడితే.. కచ్చితంగా చేసేస్తా!

మూడేళ్లుగా తన పురోగతికి భయమే కారణమంటోంది నటి సమంత. రోజూ బోలెడంత భయం మధ్య జీవిస్తుంటానని చెబుతున్న ఆమె.. దాన్ని అధిగమించడానికి మార్గాలు అన్వేషిస్తుంటానని తెలిపింది. ఈ ప్రయాణంలోనే వ్యక్తిగా, నటిగా తనని తాను మరింత మెరుగ్గా తీర్చిదిద్దుకోగలుగుతున్నాని చెబుతోంది. ప్రస్తుతం ఆమె ‘శాకుంతలం’తో ప్రేక్షకుల ముందుకొస్తున్న సంగతి తెలిసిందే. కాళిదాసు రచించిన అభిజ్ఞాన శాకుంతలం ఆధారంగా గుణశేఖర్‌ తెరకెక్కించిన ప్రేమ కావ్యమిది. ఏప్రిల్‌ 14న విడుదల కానుంది. ఈ పౌరాణిక ప్రేమ కథా చిత్రం కోసం తనని సంప్రదించినప్పుడు తొలుత చేయనని చెప్పిందట సమంత. ఆ పాత్రకు తాను సరిపోతానో.. లేదో అన్న భయమే దానికి కారణమంది. ‘‘గుణశేఖర్‌ నాకు శాకుంతలం కథ చెప్పినప్పుడు నేను చేయనని చెప్పేశా. నాకు చాలా భయం వేసింది. ఎందుకంటే నేను శకుంతలలా ఉండను. నాలో ఆ తేజస్సు, ఠీవీ కనిపించవు కదా అనిపించింది. అందుకే కథ వినగానే తొలుత చేయనని చెప్పేశా. అయితే ఈ మధ్య కాలంలో నేనిలా ఏ పాత్ర విషయంలోనైనా భయపడ్డానంటే కచ్చితంగా ఆ పాత్ర నేను చేయాల్సిందేనని నిర్ణయించేసుకుంటున్నా. నేనెందుకు చేయలేను అనుకుంటూ నాలోని ఆ భయాన్ని దాటేందుకు ప్రయత్నిస్తున్నా. ఇదే పద్ధతిని వ్యక్తిగత జీవితంలోనూ అనుసరిస్తున్నా. వ్యక్తిగా, నటిగా మూడేళ్లుగా నా పురోభివృద్ధికి కారణం ఈ భయమే’’ అని వివరించింది సామ్‌. ఆమె ప్రస్తుతం విజయ్‌ దేవరకొండతో కలిసి ‘ఖుషి’లో నటిస్తోంది.