పక్కన సతీమణి.. పాట పాడిన బన్నీ

వీడియో షేర్‌ చేసిన అల్లు శిరీష్‌

హైదరాబాద్‌: స్టైలిష్ స్టార్‌ అల్లు అర్జున్ ‘అల వైకుంఠపురములో..’ సక్సెస్‌ను ఎంజాయ్‌ చేస్తున్నారు. సంక్రాంతి పండగ సందర్భంగా కొణిదెల, అల్లు కుటుంబ సభ్యులంతా కలిసిన సంగతి తెలిసిందే. ఈ వేడుకలో భాగంగా బుధవారం రాత్రి ఆర్కెస్ట్రా నిర్వహించారు. ఓ గాయకుడు ‘సామజవరగమన..’, ‘రాములో రాములో..’ తదితర పాటల్ని ఆలపించారు. ఈ సమయంలో బన్నీ గాయకుడితోపాటు గొంతుకలిపారు. కుర్చీలో కూర్చొని ‘సామజవరగమన..’ అంటూ పాడారు. పక్కనే ఉన్న స్నేహారెడ్డి బన్నీని పట్టుకుని తెగ సిగ్గుపడుతూ కనిపించారు. ఈ చక్కటి వీడియోను అల్లు శిరీష్‌ ఇన్‌స్టాగ్రామ్‌లో షేర్‌ చేశారు. ‘ఇది నా సంక్రాంతిని ప్రత్యేకం చేసింది. ఈ సీజన్‌లో నాకు ఎంతో నచ్చిన ‘సామజవరగమన..’ పాట.. నాకిష్టమైన ఇద్దరు వ్యక్తులు’ అని కామెంట్‌ చేశారు.

అంతేకాదు ఇదే కార్యక్రమంలో బన్నీ.. నిహారికతో కలిసి ‘రాములో రాములో..’ పాటకు స్పెప్పులేశారు. ఈ వీడియోను కల్యాణ్‌ దేవ్‌ షేర్‌ చేశారు. తన మామయ్య చిరంజీవి, భార్య శ్రీజతో కలిసి తీసుకున్న సెల్ఫీలను కూడా కల్యాణ్‌ దేవ్‌ షేర్‌ చేశారు. పండగ సంబరాలు అంటూ క్యాప్షన్‌ ఇచ్చారు. శ్రీజ చిన్న పాపను చిరు ఎత్తుకుని కనిపించారు.