HanuMan: ‘హనుమాన్‌’ అప్‌డేట్‌.. ఓటీటీ కన్నా ముందే టీవీలో ప్రసారం.. ఎప్పుడంటే?

ఇంటర్నెట్‌ డెస్క్‌: హిట్‌ చిత్రం ‘హనుమాన్‌’ (HanuMan) ఓటీటీ రిలీజ్‌ డేట్‌ కోసం సినీ ప్రియులంతా ఆసక్తిగా ఎదురుచూస్తున్నారు. కానీ, ఈ చిత్రం ఓటీటీ (HanuMan OTT Release) కన్నా ముందు టీవీలో ప్రసారం కానుంది. మార్చి 16న రాత్రి 8 గంటలకు కలర్స్‌ సినీప్లెక్స్‌ (Colors Cineplex) ఛానల్‌, జియో సినిమా (Jio Cinema)లో కేవలం హిందీలో టెలికాస్ట్‌ అవుతుంది. ఈ వివరాలను కలర్స్‌ సినీప్లెక్స్‌ సంస్థ తమ సోషల్‌ మీడియా ఎక్స్‌ (ఇంతకుముందు ట్విటర్‌) ఖాతాలో పోస్ట్‌ పెట్టింది. దర్శకుడు ప్రశాంత్‌ వర్మ దాన్ని రీట్వీట్‌ చేయడంతో అధికారికంగా ప్రకటించినట్లైంది.

మార్చి 2 నుంచి ‘జీ 5’లో ‘హనుమాన్‌’ స్ట్రీమింగ్‌ అవుతుందంటూ కొన్ని రోజులు ప్రచారం జరిగిన సంగతి తెలిసిందే. తర్వాత, మార్చి 8న విడుదలవుతుందని టాక్‌ వినిపించింది. దీంతో, కొందరు అభిమానులు సోషల్‌ మీడియాలో ‘జీ5’ (Zee 5) సంస్థ ఖాతాను ట్యాగ్‌ చేస్తూ ఈ సినిమా ఎప్పుడొస్తుందని కోరారు. దానిపై స్పందించిన సదరు సంస్థ విడుదల తేదీపై నిర్ణయం తీసుకోలేదని తెలిపింది. తేజ సజ్జా హీరోగా ప్రశాంత్‌ వర్మ తెరకెక్కించిన ఈ సినిమా ఈ ఏడాది సంక్రాంతి కానుకగా విడుదలై ఘన విజయాన్ని అందుకుంది. రూ.40 కోట్ల బడ్జెట్‌తో రూపొందించిన ఈ మూవీ రూ.330 కోట్లకుపైగా వసూళ్లు రాబట్టింది.