Krithi Shetty: ‘ఊ అంటావా మావ’.. అలాంటి పాట నేను చేయను: కృతిశెట్టి

హైదరాబాద్‌: ‘ఊ అంటావా మావ ఊ ఊ అంటావా’ పాటలో సమంత (Samantha) అద్భుతంగా డ్యాన్స్‌ చేసిందని నటి కృతిశెట్టి (Krithi Shetty) అన్నారు. అయితే, తాను అలాంటి పాటలు చేయడానికి ఆసక్తిగా లేనని వెల్లడించింది. ‘కస్టడీ’ (Custody) ప్రమోషన్స్‌లో భాగంగా ఇటీవల ఇచ్చిన ఓ ఇంటర్వ్యూలో కృతిశెట్టిని.. ‘‘ఊ అంటావా మావ’ వంటి స్పెషల్‌ సాంగ్‌లో మీకు అవకాశం వస్తే చేస్తారా?’’ అని విలేకరి అడిగిన ప్రశ్నకు ఆమె స్పందించింది.

‘‘ప్రస్తుతానికి నేను అలాంటివి అంగీకరించాలనుకోవడం లేదు. దానిపై నాకు ఎలాంటి అవగాహన లేదు. ఎప్పుడూ ఆలోచించలేదు. ఇప్పటివరకూ నా సినీ ప్రయాణంలో నేను తెలుసుకున్నది ఒక్కటే. సౌకర్యంగా అనిపించనప్పుడు చేయకపోవడం మంచిది. ఇక, ఆ పాటలో సమంత అద్భుతంగా డ్యాన్స్‌ చేశారు. ఆమె ఒక ఫైర్‌’’ అని అన్నారు. అనంతరం ఆమె ‘శ్యామ్‌ సింగరాయ్‌’ గురించి మాట్లాడుతూ.. ‘‘శ్యామ్‌ సింగరాయ్‌’లోని కొన్ని రొమాంటిక్‌ సీన్స్‌లో నేను వంద శాతం మనస్ఫూర్తిగా నటించలేకపోయాను. హార్ట్‌ఫుల్‌గా చేయాలనిపించనప్పుడు వాటిని చేయకపోవడమే బెటర్‌ అనే విషయాన్ని అప్పుడే తెలుసుకున్నా. భవిష్యత్తులోనూ ఈ విషయాన్ని గుర్తు పెట్టుకుని ముందుకు సాగుతా’’ అని కృతిశెట్టి చెప్పుకొచ్చింది.

ఇక, ఇదే ఇంటర్వ్యూలో నాగచైతన్య గురించి మాట్లాడుతూ.. ‘‘చైతన్యతో ఇది నా రెండో ప్రాజెక్ట్‌. ఆయన చాలా మంచి వ్యక్తి. పరిశ్రమలో ఆయనే నాకు స్ఫూర్తి. ఏదైనా విషయంలో నాకు సందేహం వస్తే వెంటనే ఆయనకే ఫోన్‌ చేసి సలహాలు అడుగుతాను. ‘‘నన్ను అస్సలు అడగవద్దు’’ అని అంటూనే ఆయన మంచి సలహాలు ఇస్తుంటారు’’ అని తెలిపింది కృతి.