Major: ‘మేజర్‌’ శేష్‌ పాటతో వచ్చారు.. ధనుష్‌ ‘సార్‌’ షూట్‌ మొదలెట్టారు!

ఇంటర్నెట్‌ డెస్క్‌: ప్రేక్షకుల్ని అలరించేందుకు 2022లో వైవిధ్యభరిత కథలు సిద్ధమవుతున్నాయి. సరికొత్త కాంబినేషన్లు తెరపైకి వస్తున్నాయి. మేజర్‌ సందీప్ ఉన్నికృష్ణన్‌ జీవిత కథను అడివి శేష్‌ పరిచయం చేయనున్నారు. వెంకీ అట్లూరి దర్శకత్వంలో కోలీవుడ్‌ ప్రముఖ నటుడు ధనుష్‌ ‘సార్‌’ అనే చిత్రంలో నటిస్తున్నారు. ఈ రెండు క్రేజీ ప్రాజెక్టులకు సంబంధించిన అప్‌డేట్స్‌పై ఓ లుక్కేయండి.

లుక్‌ అదిరింది సార్‌..

ధనుష్‌ నటిస్తున్న తొలి తెలుగు చిత్రం ‘సార్‌’. ఇటీవల పూజా కార్యక్రమాలతో లాంఛనంగా ప్రారంభమైన ఈ సినిమా రెగ్యులర్‌ షూటింగ్‌ నేడు మొదలైంది. ఓ పోస్టర్‌ను పంచుకుంటూ చిత్ర బృందం ఈ విషయాన్ని తెలియజేసింది. ధనుష్‌.. టక్‌ లుక్‌ అందరినీ ఆకట్టుకునేలా ఉంది. ధనుష్‌ ముఖం కనిపించకుండా వెనుదిరిగి ఉన్న ఫొటోని షేర్‌ చేసి చిత్ర బృందం ప్రేక్షకుల్లో ఆసక్తిని పెంచుతోంది. ఈ సినిమాలో ధనుష్‌ జూనియర్‌ కాలేజీ లెక్చరర్‌గా నటిస్తున్నట్టు తెలుస్తోంది. ధనుష్‌ సరసన సంయుక్త మేనన్‌ నటిస్తోంది. ఈ చిత్రాన్ని సితార ఎంటర్‌టైన్‌మెంట్స్‌, ఫార్చ్యూన్‌ ఫోర్‌ సినిమాస్‌ సంయుక్తంగా నిర్మిస్తున్నాయి. సాయికుమార్‌, తనికెళ్ల భరణి కీలక పాత్రల్లో కనిపించనున్నారు. ఈ చిత్రానికి సంగీతం: జి.వి.ప్రకాష్‌, కూర్పు: నవీన్‌ నూలి, ఛాయాగ్రహణం: దినేష్‌ కృష్ణన్‌.

వినవే హృదయమా..

‘మేజర్‌’లోని ‘హృదయమా’ అనే గీతాన్ని ప్రముఖ నటుడు మహేశ్‌బాబు సోషల్‌ మీడియా వేదికగా శుక్రవారం విడుదల చేశారు. సిధ్‌ శ్రీరామ్‌ ఆలపించిన ఈ గీతం అన్ని వర్గాల శ్రోతల్ని అలరించేలా ఉంది. వీఎన్‌వీ రమేశ్‌కుమార్‌, కృష్ణకాంత్‌ రచించిన ఈ గీతానికి శ్రీచరణ్‌ పాకాల స్వరాలందించారు. శేష్‌, సయీ మంజ్రేకర్‌లపై చిత్రీకరించిన ప్రేమ గీతమిది. ఈ చిత్రానికి శశికిరణ్‌ తిక్కా దర్శకత్వం వహిస్తున్నారు. ఇందులో శేష్‌ టైటిల్‌ పాత్రలో కనిపించనున్నారు. శోభిత ధూళిపాళ మరో కథానాయిక. ఈ సినిమాని జి.ఎమ్‌.బి ఎంటర్‌టైన్‌మెంట్‌, ఏ ప్లస్‌ ఎస్‌ మూవీస్‌తో కలిసి సోనీ పిక్చర్స్‌ ఫిల్మ్స్‌ ఇండియా నిర్మిస్తోంది.