Mrunal Thakur: మేమూ మనుషులమే.. నెటిజన్‌ వ్యాఖ్యలకు మృణాల్‌ అసహనం

ముంబయి: ‘సీతారామం’(Sita Ramam)తో తెలుగువారికి చేరువైన బాలీవుడ్‌ భామ మృణాల్‌ ఠాకూర్ (Mrunal Thakur)‌. ప్రస్తుతం ‘సెల్ఫీ’ (Selfiee), నాని (Nani 30) సినిమాల్లో నటిస్తోన్న ఈ నటి తాజాగా ట్విటర్‌ వేదికగా అభిమానులతో ముచ్చటించింది. ఇందులో ఓ నెటిజన్‌ మృణాల్‌ మాట తీరును తప్పుబట్టాడు. తనకు కాబోయే భర్త గురించి మృణాల్‌ గతంలో చేసిన వ్యాఖ్యలు, ఇటీవల కపిల్‌ శర్మ షోలో పాల్గొన్నప్పుడు చెప్పిన మాటలు జత చేస్తూ.. ఆమె రెండు నాల్కల ధోరణిలో మాట్లాడుతోందని వ్యాఖ్యలు చేశాడు. దీనిపై ఆమె అసహనం వ్యక్తం చేసింది.

‘‘కాబోయే భర్త ఎలా ఉండాలనే విషయంలో గతంలోనూ, ప్రస్తుతం నాకున్న అభిప్రాయాన్ని కనీసం నేను  ధైర్యంగా చెప్పగలిగాను’’ అని బదులిచ్చింది. ఆమె (Mrunal Thakur)‌ ఇచ్చిన రిప్లైపై పలువురు నెటిజన్లు వ్యంగ్యంగా కామెంట్స్‌ చేయడం మొదలుపెట్టారు. దీనివల్ల విసిగిపోయిన ఆమె.. ‘‘నటీనటులు కూడా మనుషులేననే విషయాన్ని కొంతమంది వ్యక్తులు మర్చిపోతారనుకుంటా’’ అంటూ తన అసంతృప్తిని తెలియజేసింది.

ఇదే చిట్‌చాట్‌లో ఆమె (Mrunal Thakur)‌ తన అభిరుచులను సైతం పంచుకున్నారు. తనకి మధురైలోని దేవాలయాలంటే ఎంతో ఇష్టమని తెలిపారు. అలాగే, తనకు చీరలు నచ్చుతాయని, ఐరన్‌ మ్యాన్‌ను ఇష్టపడతానని, మార్వెల్‌ స్టూడియోస్‌ తెరకెక్కించే సూపర్‌హీరో సినిమాలో నటించాలనుందని ఆమె తెలిపారు. అయితే, గతంలో ఓ ఇంటర్వ్యూలో పాల్గొన్న మృణాల్‌ తనకు కాబోయే భర్త మంచి వాడైతే చాలని, అందం అనేది విషయం కాదని చెప్పింది. ఇటీవల కపిల్‌ శర్మ షోలో పాల్గొన్న ఆమె తనకు కాబోయే భర్త అందగాడై ఉండాలని పేర్కొంది. ఈ వ్యాఖ్యలపై పలువురు నెటిజన్లు అసహనం వ్యక్తం చేశారు. తాజాగా ఆమె ట్విటర్‌ చాట్‌ నిర్వహించగా.. దీనిని గురించే ప్రశ్నించారు.