Nani: తండ్రీకూతుళ్ల కథతో..

కొత్త ఏడాదిలోకి అడుగు పెట్టిన వేళ నాని (Nani) ఓ కొత్త కబురు వినిపించారు. ‘దసరా’ సినిమా తర్వాత చేయనున్న కొత్త చిత్రంపై స్పష్టత ఇచ్చారు. ఆయన శౌర్యువ్‌ అనే కొత్త దర్శకుడితో ఓ ప్రాజెక్టు చేయనున్నారు. ఇది నానికి 30వ చిత్రం. చెరుకూరి వెంకట మోహన్‌, విజయేందర్‌రెడ్డి, మూర్తి కలగర సంయుక్తంగా నిర్మిస్తున్నారు. మృణాల్‌ ఠాకూర్‌ కథానాయిక. ఈ చిత్ర వివరాలతో కూడిన ఓ వీడియోను ఆదివారం విడుదల చేశారు. అందులో నాని ఓ భవనంపై కూర్చొని ఫొటోలు క్లిక్‌ చేస్తూ... తన తదుపరి చిత్ర విషయమై తన ఆన్‌స్క్రీన్‌ కుమార్తెతో చర్చించడాన్ని చూపించారు. దీన్ని బట్టి ఈ సినిమా తండ్రీకూతుళ్ల అనుబంధం నేపథ్యంలో సాగే ఓ ఎమోషనల్‌ ఫ్యామిలీ ఎంటర్‌టైనర్‌గా ఉండనున్నట్లు అర్థమవుతోంది. ఇందులో నాని మీసాలు లేకుండా క్లీన్‌ షేవ్‌ లుక్‌తో సరికొత్తగా కనిపించనున్నారు. ఈ చిత్రానికి సంగీతం: హేషమ్‌ అబ్దుల్‌ వహాబ్‌, కూర్పు: ప్రవీణ్‌ ఆంటోని, ఛాయాగ్రహణం: సాను జాన్‌ వర్గీస్‌.