Cinema News: అందమైన ప్రేమకథతో..

అఖిల్‌ రాజ్‌, అనన్య జంటగా సూర్య అల్లంకొండ దర్శకత్వంలో ఓ చిత్రం తెర  కెక్కుతోంది. జి.ప్రతాప్‌ రెడ్డి నిర్మాత. ఈ సినిమా బుధవారం హైదరాబాద్‌లో పూజా కార్యక్రమాలతో లాంఛనంగా ప్రారంభమైంది. ముహూర్తం సన్నివేశానికి కాశీ విశ్వనాథ్‌ క్లాప్‌ కొట్టగా.. దగ్గుబాటి అభిరామ్‌ కెమెరా స్విచ్చాన్‌ చేశారు. జి.నాగేశ్వర్‌ రెడ్డి గౌరవ దర్శకత్వం వహించారు. అనంతరం నటి అనన్య మాట్లాడుతూ.. ‘‘ఇదొక మంచి లవ్‌స్టోరీ. ఈ కథపై మేమంతా నమ్మకంగా ఉన్నాం’’ అంది. ‘‘ఇది నా మూడో చిత్రం. యువతరం మెచ్చే ప్రేమకథతో రూపొందుతోంది’’ అన్నారు హీరో అఖిల్‌ రాజ్‌. దర్శకుడు సూర్య మాట్లాడుతూ.. ‘‘అందమైన ప్రేమకథతో ఈ సినిమా తెరకెక్కుతోంది. తూర్పు గోదావరి, పల్లమ్‌ వంటి ప్రాంతాల్లో చిత్రీకరిస్తాం. ఆగస్టు నుంచి రెగ్యులర్‌ చిత్రీకరణ ప్రారంభిస్తాం’’ అన్నారు.