Tollywood: జులై 1న పక్కా కమర్షియల్‌’, ‘రంగరంగ వైభవంగా’

ఇంటర్నెట్‌ డెస్క్‌: ఈ వేసవిలో సందడి చేయాల్సిన గోపీచంద్‌ ‘పక్కా కమర్షియల్‌’, వైష్ణవ్‌తేజ్‌ ‘రంగరంగ వైభవంగా’ చిత్రాలు వాయిదా పడ్డాయి. కొత్త విడుదల తేదీలను ఆయా చిత్ర బృందాలు సోషల్‌ మీడియా వేదికగా ప్రకటించాయి. ఈ రెండు చిత్రాలు జులై 1న బాక్సాఫీసు ముందుకు రానున్నాయి. గోపీచంద్‌, రాశీఖన్నా జంటగా మారుతి తెరకెక్కించిన చిత్రమే ‘పక్కా కమర్షియల్‌’. యువీ క్రియేషన్స్‌, గీతా ఆర్ట్స్‌ 2 పిక్చర్స్‌ సంస్థలు నిర్మించిన ఈ చిత్రాన్ని ప్రముఖ నిర్మాత అల్లు అరవింద్‌ సమర్పిస్తున్నారు. జాక్స్‌ బెజోయ్‌ సంగీతం అందించారు. ఈ హాస్యభరిత చిత్రంలో గోపీచంద్‌, రాశీఖన్నా లాయర్లుగా కనిపించనున్నారు. వైష్ణవ్‌ తేజ్‌ హీరోగా గిరీశాయ రూపొందించిన చిత్రం ‘రంగరంగ వైభవంగా’. కేతిక శర్మ కథానాయిక. దేవీశ్రీ ప్రసాద్‌ స్వరాలందించారు. ఈ ప్రేమకథా చిత్రాన్ని బి.వి.ఎస్‌.ఎన్‌. ప్రసాద్‌ నిర్మించారు.

విక్రమ్ హక్కులు..

కమల్‌ హాసన్‌ హీరోగా యాక్షన్‌ నేపథ్యంలో తెరకెక్కిన చిత్రం ‘విక్రమ్‌’. లోకేశ్‌ కనగరాజ్‌ దర్శకుడు. ఈ చిత్రం జూన్‌ 3న ప్రపంచవ్యాప్తంగా విడుదలకానుంది. తమిళనాడుకు సంబంధించిన థియేట్రికల్‌ డిస్ట్రిబ్యూషన్‌ హక్కులను నటుడు ఉదయనిధి స్టాలిన్‌ దక్కించుకున్నారు. రెడ్‌ గెయింట్‌ మూవీస్‌ పతాకంపై ఈ చిత్రాన్ని విడుదలచేయనున్నారు. ఈ సినిమాలో విజయ్‌ సేతుపతి, ఫహద్‌ ఫాజిల్‌ కీలక పాత్రలు పోషించారు. అనిరుధ్‌ సంగీతం సమకూర్చారు.