Paruchuri Gopala Krishna: మహేశ్‌ని ఎప్పుడూ అలా చూడలేదు: పరుచూరి

హైదరాబాద్‌: సూపర్‌స్టార్‌ కృష్ణ సతీమణి, మహేశ్‌బాబు తల్లి ఇందిరా దేవికి (Indira Devi) నివాళులర్పించారు ప్రముఖ సినీ రచయిత పరుచూరి గోపాలకృష్ణ. సూపర్‌స్టార్‌ కుటుంబంతో తనకున్న అనుబంధాన్ని గుర్తు చేసుకుంటూ.. ఇలాంటి సమయంలో ఘట్టమనేని కుటుంబసభ్యులు ధైర్యంగా ఉండాలని  కోరుకున్నారు.

‘‘ఘట్టమనేని కుటుంబంతో ఎన్నో ఏళ్ల నుంచి మాకు మంచి అనుబంధం ఉంది. ఇందిరమ్మ అంటే మా దృష్టిలో మహాలక్ష్మి. ఆమె ఎక్కువగా మాట్లాడరు. ఎప్పుడూ మౌనంగానే ఉంటారు. అందర్నీ చిరునవ్వుతో పలకరిస్తుంటారు. ఆమె కాలం చేసిందని తెలిసి బాధపడ్డా. ఆమె సంస్మరణ సభలో కృష్ణగారిని కలిశా. గుండె నిబ్బరంతో కూర్చొన్నారు. ఆయన్ని చూస్తుంటే నా గుండె తరుక్కుపోయింది. చిరునవ్వుతో కనిపించే మహేశ్‌బాబుని అంత దిగులుగా చూస్తానని ఎప్పుడూ అనుకోలేదు’’ అని ఆయన పేర్కొన్నారు. గత కొంతకాలంగా అనారోగ్యంతో ఇబ్బందిపడుతోన్న ఇందిరా దేవి(70) సెప్టెంబర్‌ 28న తుదిశ్వాస విడిచారు.