Samantha: చైతో విడాకులపై మళ్లీ మళ్లీ మాట్లాడాలని లేదు!

హైదరాబాద్‌: నాగచైతన్యతో విడాకుల అంశంపై మళ్లీ మళ్లీ మాట్లాడటం తనకి ఇష్టం లేదని నటి సమంత తెలిపారు. ఇటీవల ఓ ఎంటర్‌టైన్‌మెంట్ పోర్టల్‌కు ఇంటర్వ్యూ ఇచ్చిన సామ్‌.. మొదటిసారి తన విడాకుల వ్యవహారంపై స్పందించిన విషయం తెలిసిందే. విడిపోయిన సమయంలో తాను మానసిక కుంగుబాటుకు లోనయ్యానని, చనిపోవాలనుకున్నానని ఆమె అన్నారు. 2021.. తనకి వ్యక్తిగతంగా కలిసి రాలేదని ఆమె తెలిపారు. ఈ నేపథ్యంలో తాజాగా సమంత ఓ ఆంగ్ల పత్రికకు ఇంటర్వ్యూ ఇచ్చారు.

తమ విడాకుల అంశంపై అడిగిన ప్రశ్నకు స్పందిసూ.. ‘‘మేమిద్దరం విడిపోవడంపై చాలా మంది చాలా రకాలుగా అనుకుంటున్నారు. ఆ మొత్తం వ్యవహారంపై నా అభిప్రాయాన్ని ఇప్పటికే చెప్పేశాను. కాబట్టి, ఇప్పుడు మళ్లీ మళ్లీ ఆ విషయంపై స్పందించాల్సిన అవసరం లేదని భావిస్తున్నాను’’ అని సమంత పేర్కొన్నారు.

‘ఏమాయ చేసావే’ చిత్రంతో పరిచయమైన సామ్‌-చై కొన్ని సంవత్సరాల తమ ప్రేమ అనంతరం 2017లో వివాహబంధంతో ఒక్కటయ్యారు. ఈ ఏడాది అక్టోబర్‌ 2న విడిపోతున్నట్లు ప్రకటించారు. మరోవైపు, ప్రస్తుతం సామ్‌ వరుస సినిమాలు ఓకే చేస్తున్నారు. ‘యశోద’, ‘అరెంజ్‌మెంట్స్‌ ఆఫ్‌ లవ్‌’లకు పచ్చజెండా ఊపిన ఆమె, బాలీవుడ్‌లోనూ ప్రాజెక్ట్‌లు ఓకే చేసినట్లు సమాచారం. ‘పుష్ప’లో ఓ స్పెషల్‌ సాంగ్‌లో సామ్‌ మెరవనున్న విషయం తెలిసిందే.