Shah Rukh Khan: అతడు ఎన్నో ఏళ్లుగా మాకు అండగా ఉంటున్నాడు: షారుక్‌

హైదరాబాద్‌: కొన్ని రోజులుగా ఎక్కడ విన్నా బాలీవుడ్‌ బాద్‌షా షారుక్‌ ఖాన్‌(Shah Rukh Khan) పేరు వినిపిస్తోంది. ఈ కింగ్‌ ఖాన్‌ నటించిన తాజా చిత్రం ‘పఠాన్‌’ విడుదలకు సిద్ధమైంది. షారుక్‌ సరసన దీపికా పదుకొణె (Deepika Padukone) నటించిన ఈ మూవీ రేపు(జనవరి 25) ప్రపంచవ్యాప్తంగా ప్రేక్షకుల ముందుకు రానుంది. ఇక ఈ సినిమా షూటింగ్‌ పూర్తయిన దగ్గరి నుంచి ప్రచారం మొదలుపెట్టిన చిత్రబృందం తాజాగా జోరు పెంచింది. అందులో భాగంగా షారుక్‌ ట్విటర్‌ వేదికగా మరోసారి అభిమానులు అడిగిన ప్రశ్నలకు సమాధానాలు చెప్పారు. ఈ సందర్భంగా ఓ అభిమాని అజయ్‌దేవ్‌గణ్‌ (Ajay Devgn) వీడియోను షేర్‌ చేశాడు.

అందులో అజయ్‌ దేవగణ్‌ మాట్లాడుతూ..‘‘ఇటీవల విడుదలైన ‘దృశ్యం2’ సినిమా సూపర్‌ హిట్‌ టాక్‌ సొంతం చేసుకున్నప్పుడు చాలా సంతోషం వేసింది.  అలా హిట్‌ అయ్యే సినిమాలు ఇండస్ట్రీకి ఇవ్వాలని అనుకున్నా. ఏ సినిమా విడుదలైనా హిట్‌ అవ్వాలని కోరుకుంటున్నాను. ఇండస్ట్రీ అంతా ఒక్కటే. త్వరలోనే ‘పఠాన్‌’(Pathaan) విడుదలవ్వనుంది. అడ్వాన్స్‌ బుకింగ్స్‌ భారీగా ఉన్నాయి. ఆ సినిమా హిట్‌ అవ్వాలని మనస్ఫూర్తిగా కోరుకుంటున్నా’’ అని అన్నారు. ఇక ఈ వీడియోపై స్పందించిన షారుక్‌ ‘‘అజయ్‌ ఎన్నో సంవత్సరాలుగా నాకు, నా కుటుంబానికి అండగా ఉంటున్నాడు. అతడు ఓ అద్భుతమైన నటుడు’’ అని అన్నాడు.