Suriya: ‘శివ పుత్రుడు’ కాంబో రద్దు.. బాల చిత్రం నుంచి వైదొలిగిన సూర్య

చెన్నై: ‘శివ పుత్రుడు’ సినిమాతో హిట్‌ కాంబినేషన్‌గా నిలిచారు దర్శకుడు బాల (Bala), నటుడు సూర్య (Suriya). కోలీవుడ్‌తోపాటు టాలీవుడ్‌లోనూ మంచి క్రేజ్‌ సంపాదించారు. అలాంటి వీరిద్దరూ కలిసి ఇటీవల ‘వనన్‌గాన్‌’ (అచలుడు) (Vanangaan) అనే చిత్రాన్ని ప్రకటించిన సంగతి తెలిసిందే. సుమారు 19 ఏళ్ల తర్వాత ఈ కాంబోలో చిత్రం వస్తుందని తెలియడంతో సినీ అభిమానులు ఖుషీ అయ్యారు. కానీ, తాజా ప్రకటనతో నిరాశ చెందుతున్నారు. ఈ సినిమా నుంచి సూర్య వైదొలిగినట్టు బాల వెల్లడించడంతో సోషల్‌ మీడియాలో చర్చ జరుగుతోంది.  భారీ అంచనాల నడుమ ప్రారంభమైన ఈ సినిమా తొలి షెడ్యూల్‌ను కన్యాకుమారిలో షూట్‌ చేశారు. టైటిల్‌ పోస్టర్‌, సూర్య లుక్‌కు విశేష స్పందన లభించింది. ఈ సినిమాకి సూర్య, ఆయన సతీమణి, నటి జ్యోతిక నిర్మాతలుగా వ్యవహరించారు. కృతిశెట్టి కథానాయికగా నటించారు.