Liger: విజయ్‌ దేవరకొండ అభిమానులకు పూనకాలే.. సర్‌ప్రైజ్‌ ఇచ్చిన చిత్రబృందం..!

హైదరాబాద్‌: ‘అర్జున్‌రెడ్డి’, ‘గీతగోవిందం’ వంటి ప్రేమకథా చిత్రాలతో ప్రేక్షకుల్ని అలరించిన విజయ్‌ దేవరకొండ నటిస్తోన్న తొలి యాక్షన్‌ ఎంటర్‌టైనర్‌ ‘లైగర్‌’. కిక్‌ బాక్సింగ్‌ నేపథ్యంలో తెరకెక్కుతోన్న ఈ చిత్రానికి పూరీ జగన్నాథ్‌ దర్శకత్వం వహిస్తున్నారు. ఈ సినిమా గింప్స్‌, టీజర్‌ల కోసం అభిమానులు ఎన్నో రోజుల నుంచి ఎదురుచూస్తున్నారు. ఈ నేపథ్యంలో నూతన సంవత్సరానికి స్వాగతం పలుకుతూ శుక్రవారం ఉదయం.. ‘లైగర్‌’ ఫస్ట్‌ గింప్స్‌ని చిత్రబృందం సోషల్‌మీడియా వేదికగా విడుదల చేసింది.

‘‘లేడీస్ అండ్‌ జెంటిల్‌మేన్‌ మీ అందరూ ఎదురుచూస్తోన్న రోజు వచ్చేసింది. MMA World ChampionsShip పోటీలు ప్రారంభమయ్యాయి. ముంబయి వీధుల్లో పెరిగిన స్లమ్‌డాగ్‌, చాయ్‌ వాలా.. ది లైగర్‌’’ అంటూ విజయ్‌దేవరకొండని పరిచయం చేసే సన్నివేశాలతో ప్రారంభమైన గింప్స్‌లో ప్రతి సీన్‌ అదరగొట్టేలా సాగింది. ‘వి ఆర్‌ ఇండియన్స్‌’ అంటూ విజయ్‌ చెప్పే డైలాగ్‌లు, యాక్షన్‌ సన్నివేశాల్లో ఆయన నటన మెప్పించేలా ఉంది. పాన్‌ ఇండియా చిత్రంగా తెరకెక్కుతోన్న ఈ సినిమాలో విజయ్‌ దేవరకొండ సరసన అనన్యపాండే సందడి చేయనున్నారు. ప్రముఖ బాక్సర్‌ మైక్‌టైసన్‌ ఈసినిమాలో కీ రోల్‌ పోషించారు. ఛార్మి, కరణ్‌ జోహర్‌ ఈ చిత్రాన్ని నిర్మిస్తున్నారు.

► Read latest Cinema News and Telugu News