Acharya: ‘ఆచార్య’ ప్రత్యేక గీతం.. స్టెప్పులతో మెస్మరైజ్‌ చేస్తున్న చిరు

ఇంటర్నెట్‌ డెస్క్: నటుడు చిరంజీవి- సంగీత దర్శకుడు మణిశర్మ కాంబినేషన్‌కు టాలీవుడ్‌లో మంచి క్రేజ్‌ ఉంది. మణిశర్మ బీట్‌లకు చిరంజీవి స్టెప్పు కలిస్తే సినీ అభిమానులకు పండగే. చాలాకాలం తర్వాత ‘ఆచార్య’ చిత్రంతో ఆ పండగ వాతావరణాన్ని తీసుకొచ్చారు. ఇప్పటికే విడుదలైన ఈ సినిమాలోని ‘లాహే లాహే’, ‘నీలాంబరి’ పాటలు విశేషంగా అలరించాయి. ఇప్పుడా జాబితాలోకి మరో హుషారైన గీతం చేరింది. ఈ సినిమాలోని ‘సానా కష్టం వచ్చిందే మందాకినీ’ అనే ప్రత్యేక గీతాన్ని చిత్ర బృందం సోమవారం విడుదల చేసింది. మణిశర్మ సంగీతం, చిరంజీవి స్టెప్పులు ప్రతి ఒక్కరినీ ఆకట్టుకునేలా ఉన్నాయి. ఈ పాటలో చిరుకి జోడీగా రెజీనా సందడి చేసింది. భాస్కరభట్ల రవికుమార్‌ రచించిన ఈ పాటను రేవంత్‌, గీతామాధురి ఆలపించారు.

దేవాదాయ శాఖ నేపథ్యంలో కొరటాల శివ ఈ సినిమాను తెరకెక్కిస్తున్నారు. చిరంజీవి తనయుడు, నటుడు రామ్‌చరణ్‌.. సిద్ధ అనే కీలక పాత్ర పోషించారు. చిరుకు జోడీగా కాజల్‌, చరణ్‌కు జంటగా పూజాహెగ్డే  నటించారు. ఈ చిత్రాన్ని కొణిదెల ప్రొడెక్షన్స్‌, మ్యాట్నీ ఎంటర్‌టైన్‌మెంట్స్‌ సంయుక్తంగా నిర్మిస్తున్నాయి. ఈ సినిమా ఫిబ్రవరి 4న విడుదలకానుంది.

► Read latest Cinema News and Telugu News