‘పసలపూడి వీరబాబు’గా కార్తి.. నేరుగా ఓటీటీలో తెలుగు వెర్షన్‌ చూసేయండి

హైదరాబాద్‌: తమిళంతో పాటు, తెలుగులోనూ మంచి క్రేజ్‌ ఉన్న నటుడు కార్తి (Karthi). ఆయన నటించిన ప్రతి సినిమా తెలుగులోనూ విడుదలవుతుంది. అయితే, ఆగస్టు 12న తమిళంలో ప్రేక్షకుల ముందుకు వచ్చిన ‘విరుమన్‌’ (Viruman) తెలుగు వెర్షన్‌ మాత్రం విడుదల చేయలేదు. ఆ తర్వాత అమెజాన్‌ ప్రైమ్‌ వీడియో వేదికగా తమిళ వెర్షన్‌ స్ట్రీమింగ్‌ తీసుకొచ్చారు. ఈ సినిమా చూడలేకపోయామే అని బాధపడుతున్న తెలుగు అభిమానులకు అమెజాన్‌ ప్రైమ్‌ వీడియో తీపి కబురు చెప్పింది. ‘విరుమన్‌’ను ‘పసలపూడి వీరబాబు’ (Pasalapoodi Veerababu) గా అందుబాటులో తెచ్చింది. ప్రస్తుతం ఈ సినిమా స్ట్రీమింగ్‌ అవుతోంది. గ్రామీణ నేపథ్యంలో సాగే మాస్‌ యాక్షన్‌ డ్రామా కథాంశంతో ముత్తయ్య దీన్ని తెరకెక్కించారు. అగ్ర దర్శకుడు శంకర్‌ కుమార్తె అదితి శంకర్‌ కథానాయికగా నటించిన ఈ చిత్రంలో ప్రకాశ్‌రాజ్‌, రాజ్‌కిరణ్‌, సూరి కీలక పాత్రలు పోషించారు. మాస్‌ప్రేక్షకులను దృష్టిలో పెట్టుకుని సినిమాను తీర్చిదిద్దినట్లు ట్రైలర్‌ చూస్తే అర్థమవుతోంది.