సింగపూర్‌లో వైభవంగా సామూహిక శ్రీ సత్యనారాయణ స్వామి వ్రతం

సింగపూర్‌: కాకతీయ సాంస్కృతిక పరివారం సింగపూర్ ఆధ్వర్యంలో సామూహిక శ్రీ సత్యనారాయణ స్వామి వ్రతం కన్నుల పండుగగా జరిగింది. ఈ వ్రతంలో సింగపూర్‌లో ఉన్న 75మంది  తెలుగు దంపతులు పాల్గొని అత్యంత భక్తి శ్రద్దలతో ఈ వ్రతాన్ని నోచుకొన్నారు. కార్యక్రమ నిర్వాహకులు వ్రతం చేసుకోవడానికి కావాల్సిన పూజా ద్రవ్యాలు, స్వామి వారి రూపు, పటం భక్తులకు అందించారు. ఈ వ్రతానికి దాదాపు 400మంది ప్రత్యక్షంగా తిలకించి స్వామి వారి కృపకు పాత్రులయ్యారు. వ్రతం సింగపూర్ శ్రీ శ్రీనివాస పెరుమాళ్ ఆలయ ప్రాంగణంలో పీజీపీ హాలులో శనివారం (అక్టోబర్‌ 28) నిర్వహించారు. ఈ కార్యక్రమం అనంతరం భక్తులకు అన్న ప్రసాదాలు పంపిణీ చేశారు. ఈ కార్యక్రమాన్ని ఎంతో అద్భుతంగా నిర్వహించిన సంస్థ సభ్యులకు, నిర్వహణలో సహకరించిన వాలంటీర్లు, అన్నదానానికి సాయం చేసిన దాతలందరికీ కాకతీయ పరివారం కార్యనిర్వాహకులు ధన్యవాదాలు తెలిపారు.