Asia cup: ఆసియాకప్‌ వేదికపై తుది నిర్ణయం అప్పుడే

దిల్లీ: ఐపీఎల్‌ ఫైనల్‌ తర్వాతే ఆసియా కప్‌ వేదికపై తుది నిర్ణయం తీసుకుంటామని బీసీసీఐ కార్యదర్శి జై షా అన్నాడు. ఆసియా క్రికెట్‌ కౌన్సిల్‌ (ఏసీసీ) ప్రతినిధులు ఐపీఎల్‌ ఫైనల్‌కు హాజరవుతారని గురువారం అతడు తెలిపాడు. ఈ ఏడాది ఆసియా కప్‌కు పాకిస్థాన్‌ ఆతిథ్యం ఇవ్వాల్సి ఉండగా.. కేంద్ర ప్రభుత్వం అనుమతి లేకుండా భారత జట్టును ఆ దేశానికి పంపకూడదని బీసీసీఐ నిర్ణయించింది. ఆసియా కప్‌లో టీమ్‌ఇండియా మ్యాచ్‌ల్ని తటస్థ వేదికపై నిర్వహిస్తామంటూ పాకిస్థాన్‌ క్రికెట్‌ బోర్డు (పీసీబీ) ఛైర్మన్‌ నజమ్‌ సేథీ ప్రతిపాదన కూడా చేశాడు. ‘‘ఆసియా కప్‌ ఆతిథ్యానికి సంబంధించి ఇంకా నిర్ణయం తీసుకోలేదు. మేం ఐపీఎల్‌తో తీరిక లేకుండా ఉన్నాం. శ్రీలంక, బంగ్లాదేశ్‌, అఫ్గానిస్తాన్‌ క్రికెట్‌ బోర్డుల నుంచి అత్యున్నత స్థాయి ప్రముఖులు ఐపీఎల్‌ ఫైనల్‌ చూసేందుకు వస్తున్నారు. మేం చర్చించుకుని తుది నిర్ణయం తీసుకుంటాం’’ అని జై షా పేర్కొన్నాడు. ఈ ఏడాది సెప్టెంబరు 1 నుంచి 17 వరకు ఆసియాకప్‌ జరగాల్సి ఉంది.