అవే సిరాజ్‌ బలాలు

బెంగళూరు: తనపై తనకి నమ్మకం, వెనుదీయని తత్వం పేసర్‌ మహ్మద్‌ సిరాజ్‌ నిజమైన బలాలని సునీల్‌ గావస్కర్‌ అన్నాడు. ‘‘మైదానంలో సిరాజ్‌ సర్వశక్తులూ ఒడ్డుతాడు. ఆస్ట్రేలియా పర్యటనలో తన తండ్రి మరణించినా కూడా అతడు జట్టుతోనే కొనసాగాడు. కుటుంబం కోసం స్వదేశానికి రమ్మని చాలామంది కోరినా కూడా దేశానికి ప్రాముఖ్యత ఇచ్చాడు. ఆ సమయానికి అతడేం పెద్ద క్రికెటర్‌ కూడా కాదు. ఆ సిరీస్‌లో గబ్బా టెస్టులో అతడు గొప్పగా బౌలింగ్‌ చేశాడు. కుదురుకున్న స్టీవ్‌ స్మిత్‌ను ఔట్‌ చేసి మ్యాచ్‌ను మలుపు తిప్పాడు. తన శక్తిపై తనకి నమ్మకం, వెనుకంజ వేయని తత్వం సిరాజ్‌ నిజమైన బలాలు’’ అని సన్నీ పేర్కొన్నాడు. ఐపీఎల్‌-17లో బెంగళూరు-గుజరాత్‌ టైటాన్స్‌ మ్యాచ్‌లో పవర్‌ప్లేలో సిరాజ్‌ అద్భుతంగా బౌలింగ్‌ చేశాడు. కెప్టెన్‌ శుభ్‌మన్‌ గిల్‌ సహా రెండు వికెట్లు తీసి ప్రత్యర్థిని తక్కువ స్కోరుకే కట్టడి చేయడంలో కీలకపాత్ర పోషించాడు.