Rajasthan X Gujarat: రాజస్థాన్‌కు షాక్‌.. ఉత్కంఠ పోరులో గుజరాత్‌ విజయం

జైపుర్‌: ఐపీఎల్‌ 17వ సీజన్‌లో రాజస్థాన్‌ (Rajasthan) జైత్రయాత్రకు బ్రేక్‌పడింది. జైపుర్‌ వేదికగా జరిగిన ఉత్కంఠ పోరులో గుజరాత్‌ 3 వికెట్ల తేడాతో నెగ్గింది. 197 పరుగుల లక్ష్యంతో బ్యాటింగ్‌ చేసిన గుజరాత్‌ 7 వికెట్లు కోల్పోయి ఇన్నింగ్స్‌ చివరి బంతికి విజయం సాధించింది. చివరి బంతికి రెండు పరుగులు అవసరం కాగా, రషీద్‌ ఖాన్‌ (24: 11 బంతుల్లో 4 ఫోర్లు) ఫోర్‌ కొట్టి జట్టును గెలిపించాడు. కెప్టెన్ శుభ్‌మన్‌ గిల్‌ (72: 44 బంతుల్లో  6 ఫోర్లు, 2 సిక్స్‌లు) అర్ధశతకంతో చెలరేగగా, ఓపెనర్‌ సాయి సుదర్శన్‌ (35: 29 బంతుల్లో 3 ఫోర్లు, ఒక సిక్స్‌), తెవాతియా (22) విలువైన పరుగులు చేశారు. రాజస్థాన్‌ బౌలర్లలో కుల్దీప్‌ సేన్‌ 3, చాహల్‌ 2 వికెట్లు తీశారు. 

చివరి ఓవర్‌ సాగిందిలా..

• గుజరాత్ విజయానికి చివరి ఓవర్‌లో 15 పరుగులు అవసరం కాగా.. మొదటి మూడు బంతుల్లో రషీద్‌ ఖాన్‌ రెండు ఫోర్ల సాయంతో పది పరుగులు రాబట్టాడు. 
• 3 బంతుల్లో 5 పరుగులు చేయాల్సిన దశలో రషీద్ ఖాన్ సింగిల్ తీశాడు. 
• ఐదో బంతికి రాహుల్ తెవాటియా రెండు పరుగులు పూర్తి చేసుకుని మూడో రన్‌కు పరుగెత్తి రనౌటయ్యాడు. 
• చివరి బంతికి రెండు పరుగులు అవసరం ఉండగా.. రషీద్ ఖాన్‌ బౌండరీ బాదాడు. దీంతో రాజస్థాన్‌కు ఈ టోర్నీలో తొలి ఓటమి ఎదురైంది.  

అంతకుముందు బ్యాటింగ్‌ చేసిన రాజస్థాన్‌ నిర్ణీత 20 ఓవర్లలో 3 వికెట్ల నష్టానికి 196 పరుగులు చేసింది. యశస్వి జైస్వాల్‌ (24) బట్లర్‌ (8) విఫలమైనప్పటకీ.. కెప్టెన్‌ శాంసన్‌ (68*: 38 బంతుల్లో 7 ఫోర్లు, 2 సిక్స్‌లు), రియాన్‌ పరాగ్‌ (76: 48 బంతుల్లో 5 సిక్స్‌లు, 3 ఫోర్లు) మెరుపులు మెరిపించారు. 42 పరుగులకు రెండు వికెట్లు కోల్పోయిన రాజస్థాన్‌ను.. వీరిద్దరూ దూకుడుగా ఆడి మూడో వికెట్‌కు 130 పరుగుల భాగస్వామ్యం నెలకొల్పారు. హెట్‌మయర్‌ (13*) పరుగులు చేశాడు. గుజరాత్‌ బౌలర్లలో ఉమేశ్‌ యాదవ్‌, రషీద్‌ ఖాన్‌, మోహిత్‌ శర్మ తలో వికెట్‌ తీశారు.