Danushka Gunathilaka: లైంగిక ఆరోపణల కేసు.. ఆస్ట్రేలియాలో క్రికెటర్‌ అరెస్ట్‌

దిల్లీ: లైంగిక వేధింపుల కేసులో శ్రీలంక క్రికెటర్‌ దనుష్క గుణతిలకను ఆదివారం సిడ్నీ పోలీసులు అరెస్టు చేసినట్టుగా  సమాచారం అందుతోంది. టీ20 ప్రపంచకప్‌ కోసం ఆస్ట్రేలియా పర్యటనలో ఉన్న ఈ ఆటగాడిని ఇంగ్లాండ్‌తో మ్యాచ్‌ అనంతరం పోలీస్‌ స్టేషన్‌కు తరలించినట్టు తెలుస్తోంది. దీంతో ఈ ఆటగాడు లేకుండానే  శ్రీలంక జట్టు ఆస్ట్రేలియా నుంచి వెనుదిరిగింది. 

‘‘నిందితుడికి కొంతకాలం క్రితం ఆన్‌లైన్‌లో 29 ఏళ్ల మహిళ పరిచయమైంది. వీరిద్దరూ నవంబర్‌ 2న రోజ్‌ బే లోని ఓ హెటల్‌ గదిలో కలుసుకున్నారు. అనంతరం ఆమెపై అత్యాచారానికి యత్నించాడు. కేసు దర్యాప్తులో భాగంగా ఓ శ్రీలంక దేశస్థుడిని నేర విభాగం పోలీసులు అరెస్టు చేశారు’’ అని పోలీసులు వారి అధికారిక వెబ్‌సైట్‌ ద్వారా వెల్లడించారు. అయితే ఈ అంశంపై శ్రీలంక క్రికెట్‌ బోర్డు అధికారికంగా స్పందించాల్సి ఉంది. నమీబియాతో మొదటి రౌండ్‌ మ్యాచ్‌లో పాల్గొన్న ఈ లెఫ్ట్‌ హ్యాండర్‌ బ్యాటర్‌.. అనంతరం గాయం కారణంగా ఈ టోర్నమెంట్‌కు దూరమయ్యాడు.