Virat kohli: కోహ్లీని కుమారుడిగా చూస్తా.. నేనెందుకు చెడుగా మాట్లాడుతా: మాజీ సెలక్టర్‌

ఇంటర్నెట్‌ డెస్క్‌: స్టార్‌ బ్యాటర్‌ విరాట్‌ కోహ్లీ (Virat Kohli)ని తన సొంత కుమారుడిలా భావిస్తానని భారత మాజీ సెలక్టర్‌ చేతన్‌ శర్మ (Chetan Sharma) అన్నాడు. అతడు తిరిగి జట్టులోకి రావాలని ఆసక్తిగా ఎదురు చూస్తున్నానని చెప్పాడు. గతేడాది ఓ స్టింగ్‌ ఆపరేషన్‌లో విరాట్‌ కోహ్లీ, సౌరవ్‌ గంగూలీ, రోహిత్‌ శర్మ, హార్దిక్‌ పాండ్యాతో పాటు జట్టులోని ఇతర ఆటగాళ్లపై చేతన్‌ శర్మ అనుచిత వ్యాఖ్యలు చేశాడు. దానిపై దుమారం రేగడంతో సెలక్టర్‌ పదవికి రాజీనామా చేశాడు.

‘‘విరాట్‌ గురించి నేనెందుకు చెడుగా మాట్లాడతా? జట్టులోకి తిరిగి వచ్చి అంతర్జాతీయ క్రికెట్లో 100 సెంచరీలు పూర్తి చేయాలని ఆశిస్తున్నా’’ అని చేతన్‌ అన్నాడు. ప్రస్తుత కెప్టెన్‌ రోహిత్‌ శర్మ (Rohit Sharma)ను సైతం ఆయన ప్రశంసించాడు. ‘‘జట్టు కోసం తనను తాను త్యాగం చేసే కొద్దిమంది ఆటగాళ్లలో రోహిత్‌ శర్మ కూడా ఉంటాడు. ఓపెనర్లు 10 ఓవర్లలో 80 పరుగులు చేస్తే మిగిలిన బ్యాటర్లు 300 వరకు జట్టు స్కోరును తీసుకెళ్లగలరు’’ అంటూ 2023 వన్డే ప్రపంచ కప్‌లో రోహిత్‌ శర్మ ఆడిన ఎటాకింగ్‌ క్రికెట్‌ను మెచ్చుకున్నాడు.