IND vs NZ: ఉమ్రాన్‌ ఇంకా నేర్చుకోవాలి.. మణికట్టు మాంత్రికుడు ఉండాల్సిందే: వసీమ్ జాఫర్

ఇంటర్నెట్ డెస్క్: న్యూజిలాండ్‌తో కీలకమైన మూడో టీ20 మ్యాచ్‌లో సీనియర్‌ స్పిన్నర్ యుజ్వేంద్ర చాహల్‌కు తప్పకుండా అవకాశం కల్పించాలని టీమ్‌ఇండియా మాజీ ఆటగాడు వసీమ్ జాఫర్ అన్నాడు. పేసర్‌ ఉమ్రాన్‌ మాలిక్‌ ఇంకా నేర్చుకోవాల్సిన అవసరం ఉందని అభిప్రాయపడ్డాడు. పేస్‌తోపాటు లైన్‌ అండ్ లెంగ్త్‌ చాలా కీలకమని చెప్పాడు. క్లిష్టమైన సమయంలో జాగ్రత్తగా బౌలింగ్‌ చేయాలని సూచించాడు. మూడు టీ20ల సిరీస్‌లో భారత్ - కివీస్‌ చెరొక విజయంతో సమంగా నిలిచాయి. అహ్మదాబాద్ వేదికగా ఇవాళ మూడో మ్యాచ్‌ జరగనుంది. ఈ క్రమంలో తుది జట్టు ఎంపికతోపాటు ఉమ్రాన్ మాలిక్‌పై వసీమ్‌ జాఫర్‌ కీలక వ్యాఖ్యలు చేశాడు. 

‘‘స్పిన్‌ బౌలింగ్‌తో న్యూజిలాండ్‌ ఇబ్బంది పడుతోంది. అందుకే యుజ్వేంద్ర చాహల్‌ను మూడో మ్యాచ్‌లోనూ కొనసాగించాలి. మణికట్టు మాంత్రికుడు ఉన్నప్పుడు కచ్చితంగా వినియోగించుకోవాలి. నేను ఇంతకుముందు చెప్పినట్లు ఉమ్రాన్ మాలిక్‌ టీ20 ఫార్మాట్‌లో ఇబ్బంది పడుతున్నాడు. బంతులను విభిన్నంగా సంధించడంపై ఇంకా కసరత్తు చేయాలి. టీ20ల్లో బౌలింగ్‌ వేరియేషన్‌ కచ్చితంగా ఉండాలి. కివీస్‌పై చాహల్‌ను ఆడించడం అత్యుత్తమ ఎంపిక అవుతుంది. అలాగే బ్యాటింగ్‌లో శుభ్‌మన్‌ గిల్‌ కాస్త తడబాటుకు గురవుతున్నాడు. అందుకే అతడి స్థానంలో పృథ్వీషా వైపు ఆలోచిస్తే బాగుంటుంది. పృథ్వీ పొట్టి ఫార్మాట్‌కు సరిగ్గా సరిపోతాడు. తొలి రెండు మ్యాచుల్లో విఫలమైన ఇషాన్‌ కిషన్, రాహుల్‌ త్రిపాఠి ఆటతీరు పట్ల ఎలాంటి ఆందోళన అవసరం లేదు’’ అని జాఫర్ వెల్లడించాడు. గిల్‌ మొదటి రెండు మ్యాచుల్లో తక్కువ స్కోరుకే (7, 11) పరిమితమై నిరాశపరిచాడు. ఇక షా.. తన చివరి అంతర్జాతీయ మ్యాచ్‌ను జులై 2021లో ఆడటం గమనార్హం.