చెవిని తడితే ఇయర్‌ ఫోన్‌ ఆన్‌!

చెవి వద్ద వేలితో తడితే ఇయర్‌ ఫోన్‌ ఆన్‌! మరోసారి తాకితే ఆఫ్‌!! సౌండ్‌ పెంచుకోవాలంటే వేలిని పైకి జరిపితే చాలు. వేలిని కిందికి జరిపితే సౌండ్‌ తగ్గించుకోవచ్చు. అదెలా సాధ్యమని ఆశ్చర్యపోతున్నారా? గూగుల్‌ తయారుచేస్తున్న వినూత్న పరికరాల మాయాజాలమిది. ఇవి చర్మ సైగలకు అనుగుణంగా పనిచేస్తాయి మరి. అంటే స్మార్ట్‌వాచ్‌, ఇయర్‌ఫోన్‌ లాంటి పరికరాల పక్కన చర్మాన్ని తాకటం వంటి వాటి చర్యలకు స్పందిస్తాయన్నమాట. అంతా వీటిల్లోని ‘స్కిన్‌ ఇంటర్ఫేస్‌’ పరిజ్ఞానం మహత్తు. ఇది ప్రత్యేక సెన్సర్లతో కూడుకొని ఉంటుంది. సాధారణంగా చర్మాన్ని వేలితో తాకినప్పుడు స్వల్పంగా యాంత్రిక తరంగాలు పుట్టుకొస్తుంటాయి. వీటిని పరికరాల్లోని సెన్సర్లు లోపలికి చేరవేస్తాయి. అనంతరం ఈ కదలికల సమాచారం కమాండ్స్‌గా మారుతుంది. ఇవి పరికరాలతో కావాల్సిన పనులను చేయించుకోవటానికి వీలు కల్పిస్తాయి. వేలితో చర్మాన్ని తాకే తీరు, తీవ్రత, జరిపే దిశ వంటివి రకరకాల కమాండ్స్‌గా ఉపయోగపడటం గమనార్హం. ఇవే ఫోన్‌ కాల్‌ చేయటం, సౌండ్‌ను మార్చుకోవటం, ప్లేబ్యాక్‌ లాంటి పనులెన్నో చేసి పెడతాయి. అందుకే ఈ పరిజ్ఞానం భవిష్యత్తులో శరీరానికి ధరించే పరికరాల రూపురేఖలనే మార్చేయగలదని భావిస్తున్నారు.