Windows 11: కొత్త ‘విండోస్‌’ కుమ్మేసిందిగా!

ఈసారి వచ్చే విండోస్‌లో కొత్త వెర్షన్‌ మామూలుగా ఉండదని మైక్రోసాఫ్ట్‌ చాలా రోజుల నుంచి చెబుతూనే ఉంది. తాజాగా విండోస్‌ 11 పేరుతో కొత్త ఓఎస్‌ను లాంచ్‌ చేశారు. అందులో కీలక ఫీచర్లు మీ కోసం.. 

① విండోస్‌ 11లో స్టార్ట్‌ మెనూను ఎడమవైపు నుండి సెంటర్‌కు తీసుకొచ్చారు. అంటే స్టార్ట్‌ బటన్‌ క్లిక్‌ చేయగానే... యాప్స్‌ లిస్ట్‌ స్క్రీన్‌ సెంటర్‌లో పాప్‌ అప్‌ అవుతుంది.  మ్యాక్‌ ఓఎస్‌, క్రోమ్‌ ఓఎస్‌లోనే ఇలానే ఉంటుంది. 

② విండోస్‌ 10లో స్టార్ట్‌ మెనూ ఓపెన్‌ చేయగానే... ఐకాన్లు జిఫ్‌ల తరహాలో ఆటోప్లే అవుతుంటాయి. కొత్త ఓఎస్‌లో లైవ్‌ టైల్స్‌ స్థానంలో రౌండెడ్‌ కార్నర్స్‌తో  యాప్‌ ఐకాన్స్‌ను తీసుకొచ్చారు. 

③ కొత్త ఓఎస్‌లో స్నాప్‌ లేఅవుట్స్‌ అనే స్టైల్‌ తీసుకొస్తున్నారు. స్క్రీన్‌ మీద ఫోల్టర్‌/యాప్స్‌/సాఫ్ట్‌వేర్‌లను కావాల్సినట్లు అరేంజ్‌ చేసుకోవచ్చు. దీని కోసం డీఫాల్ట్‌గా ఆరు రకాల లేవుట్స్‌ ఇస్తున్నారు. మల్టీ టాస్కింగ్‌ చేసేవారి కోసం ఇది బాగా ఉపయోగపడుతుంది.   

④ ఐవోఎస్‌, ఆండ్రాయిడ్‌ మొబైల్స్‌లో తరహాలో  కొత్తగా సెర్చ్‌ డాక్యుమెంట్స్‌ ఫీచర్‌ను తీసుకొస్తున్నారు. అంటే సెర్చ్‌లో యాప్స్‌/సాఫ్ట్‌వేర్స్‌తోపాటు డాక్యుమెంట్స్‌ కూడా కనిపిస్తాయి. ఇది మైక్రోసాఫ్ట్‌ 365 వినియోగదారులకు ఉపయుక్తంగా ఉంటుంది.

⑤ విండోస్‌ కంప్యూటర్లలో అప్‌డేట్‌లు వచ్చిన ప్రతిసారి.. రీస్టార్ట్‌ అంటూ పెద్ద పనే ఉంటుంది. ఒక్కోసారి నాలుగైదు సార్లు రీస్టార్ట్‌ అవుతుంది సిస్టమ్‌. అయితే విండోస్‌11లో ఆ సమస్య ఉండదట. ఎక్కువ శాతం బ్యాగ్రౌండ్‌లోనే అప్‌డేట్లు అయిపోతాయట. 

⑥ కొత్త ఓఎస్‌లో ఆటో హెచ్‌డీఆర్‌ ఫీచర్‌ ఉంటుంది. ఎక్స్‌బాక్స్‌లో గేమ్స్‌ ఆడేవారికి ఇది కొత్త అనుభూతినిస్తుందట. ల్యాపీలు, హెచ్‌డీ మానిటర్లు ఉన్న పీసీల్లో గేమింగ్‌ అనుభూతి కొత్తగా ఉంటుందట. 

⑦ విండోస్‌11లో మైక్రోసాఫ్ట్‌ స్టోర్‌ ఆండ్రాయిడ్‌ యాప్స్‌ను కూడా సపోర్టు చేస్తుంది. ఇందులోని అమెజాన్‌ యాప్‌ స్టోర్‌ నుంచి ఆండ్రాయిడ్‌ ఆధారిత యాప్స్‌ను డౌన్‌లోడ్‌ చేసుకోవచ్చు. 

⑧ విండోస్‌ 11ను ఈ ఏడాది నవంబరు నుంచి అందుబాటులోకి తీసుకొస్తారు. విండోస్‌ 10 యూజర్లకు విండోస్‌ 11ను ఉచితంగా అప్‌డేట్‌ చేస్తారు. అయితే మీరు వాడుతున్నది జెన్యూన్‌ విండోస్‌ 10 అయి ఉండాలి. కొత్తగా విండోస్‌ 11ను ఇన్‌స్టాల్‌ చేయాలనుకునేవాళ్లు డబ్బులు చెల్లించాలి. 

⑨ విండోస్‌ 11 ఓఎస్‌ ఇన్‌స్టాల్‌/అప్‌డేట్‌ చేసుకోవాలంటే సిస్టమ్‌లో కొన్ని కనీస ఫీచర్లు ఉండాలి. సిస్టమ్‌ 64 బిట్‌ అయి ఉండాలి. కనీసం 1 జీహెచ్‌జెడ్‌ డ్యూయల్‌ కోర్‌ ప్రాసెసర్‌ అయి ఉండాలి. కనీసం 4జీబీ ర్యామ్‌, 64 జీబీ ఫ్రీ ‌ స్టోరేజీ ఉండాలి. 

మరిన్ని వివరాల కోసం దిగువ వీడియో చూడండి...