టెట్‌ వాయిదా కోరుతూ ఎన్‌ఎస్‌యూఐ ఆందోళన

జూబ్లీహిల్స్‌, న్యూస్‌టుడే: టెట్‌ వాయిదా వేయాలని కోరుతూ విద్యాశాఖ మంత్రి సబితాఇంద్రారెడ్డి ఇంటి వద్ద ఎన్‌ఎస్‌యూఐ నాయకులు, కార్యకర్తలు ఆందోళన నిర్వహించారు. వినతిపత్రం ఇచ్చేందుకు ఎన్‌ఎస్‌యూఐ రాష్ట్ర అధ్యక్షుడు బల్మూరి వెంకట్‌ నర్సింగ్‌రావు ఆధ్వర్యంలో నాయకులు, కార్యకర్తలు శనివారం హైదరాబాద్‌ శ్రీనగర్‌కాలనీలోని మంత్రి సబిత ఇంటి వద్దకు చేరుకున్నారు. నివాసంలోకి చొచ్చుకెళ్లేందుకు ప్రయత్నించడంతో పోలీసులు అడ్డుకున్నారు. దీంతో వెంకట్‌తోపాటు ఎన్‌ఎస్‌యూఐ నాయకులు, కార్యకర్తలు మంత్రి నివాసానికి సమీపంలో బైఠాయించి నినాదాలు చేశారు. పోలీసులు వారిని బలవంతంగా స్టేషన్‌కు తరలించారు. అనంతరం బల్మూరి వెంకట్‌ మాట్లాడుతూ.. ఒకే రోజున (జూన్‌ 12) టెట్‌, ఆర్‌ఆర్‌బీ పరీక్షలను నిర్వహిస్తుండటంతో అభ్యర్థులు నష్టపోవాల్సి వస్తుందన్నారు. తెలంగాణ ప్రభుత్వం రాష్ట్ర పరిధిలో ఉన్న టెట్‌ను వాయిదా వేసి వారికి న్యాయం చేయాలని డిమాండ్‌ చేశారు.