‘సెర్ప్‌’ ఉద్యోగులకు ఉగాది కానుక

1 నుంచి వేతనాలు పెంచుతూ రాష్ట్ర ప్రభుత్వం ఉత్తర్వులు

ఈనాడు, హైదరాబాద్‌: గ్రామీణ పేదరిక నిర్మూలన సంస్థ (సెర్ప్‌) ఉద్యోగులకు రాష్ట్ర ప్రభుత్వం ఉగాది కానుకను ప్రకటించింది. వారికి ఏప్రిల్‌ 1 నుంచి కొత్త వేతన విధానం (పే స్కేల్‌) అమలుకు శనివారం ఉత్తర్వులు (జీవో నం.11) జారీ చేసింది. 23 సంవత్సరాలుగా సెర్ప్‌లో పనిచేస్తున్న ఉద్యోగులకు కొత్త పే స్కేల్‌ ఇస్తామన్న సీఎం కేసీఆర్‌ హామీ మేరకు ఈ ఉత్తర్వులు జారీ అయ్యాయి. దీంతో 3,974 మందికి వేతనాలు పెరుగుతాయి. వారికి ఈఎస్‌ఐ, ఈపీఎఫ్‌లు కొనసాగుతాయని ప్రభుత్వం పేర్కొంది. దీంతో ప్రభుత్వంపై ఏడాదికి రూ.58 కోట్ల భారం పడనుంది.

* ప్రస్తుతం 716 మంది పదో తరగతి అర్హతతో మండల సమాఖ్య కమ్యూనిటీ కో-ఆర్డినేటర్లుగాను, మరో 21 మంది మండల, డివిజన్‌ ప్రతినిధులుగాను ఉన్నారు. వారికి రూ.19,000-58,850 స్కేలు వర్తిస్తుంది.

* ఇంటర్‌ అర్హతతో పనిచేస్తున్న 338 మంది మండల బుక్‌ కీపర్లకు రూ.22,240-67,300 స్కేలు..

* డిగ్రీ అర్హతతో కమ్యూనిటీ కోఆర్డినేటర్లుగా ఉన్న 1,719మందికి రూ.24,280-72,850 స్కేలు..

* పీజీ అర్హతతో సహాయ ప్రాజెక్టు మేనేజర్లుగా పనిచేస్తున్న 697 మందికి రూ.32,810-96,890 స్కేలు వర్తిస్తుంది. పీజీ అర్హతతోనే జిల్లా ప్రాజెక్టు మేనేజర్లుగా ఉన్న 160 మందికి రూ.42,300-1,15,270 స్కేలు..

* ప్రాజెక్టు మేనేజర్లుగా ఉన్న 37 మందికి రూ.51,320 - 1,27,310 వేతన స్కేలు..

* పదో తరగతి అర్హత గల 21 మంది డ్రైవర్లకు రూ.22,900-69,150; 110 మంది ఆఫీస్‌ సబార్డినేట్లకు రూ.19వేలు-58,850; డిగ్రీ అర్హతతో అడ్మినిస్ట్రేషన్‌ అసిస్టెంట్‌/ప్రాజెక్టు కార్యదర్శులుగా ఉన్న 155 మందికి రూ.24,280-72,850 పే స్కేలు ఉంటుంది.