ఉపాధి హామీకి కేంద్రం షాక్‌

వచ్చే ఆర్థిక సంవత్సరంలో రాష్ట్రానికి 7 కోట్ల పనిదినాలే
ఈ ఏడాది కంటే మూడు కోట్లు తక్కువ

ఈనాడు, హైదరాబాద్‌: వచ్చే ఆర్థిక (2023-24) సంవత్సరంలో జాతీయ గ్రామీణ ఉపాధి హామీలో తెలంగాణలో పనిదినాలు భారీగా తగ్గనున్నాయి. ఈసారి 7 కోట్ల పనిదినాలను కల్పించాలని దిల్లీలో జరిగిన ఉపాధి హామీ సాధికారత కమిటీ సమావేశంలో నిర్ణయించినట్లు రాష్ట్రానికి సమాచారం అందింది. ఈ ఆర్థిక సంవత్సరం(2022-23)తో పోలిస్తే మూడు కోట్ల పనిదినాలు తక్కువగా దక్కనున్నాయి. గత అయిదేళ్లలో ఇంత తక్కువగా  కేటాయింపు ఎప్పుడూ జరగలేదు. 2019-20లో 12 కోట్లు, 2020-21లో 13 కోట్లు, 2021-22లో 13 కోట్లు, 2022-23లో 10 కోట్ల పనిదినాలను కేంద్రం మంజూరు చేసింది.  వచ్చే ఆర్థిక సంవత్సరంలో  7 కోట్లకు తగ్గించింది. కేంద్ర బడ్జెట్‌లో ఉపాధి హామీకి నిధులను భారీగా తగ్గించడంతో ఈ ప్రభావం పనులపై పడుతుందని ముందే అంచనా వేశారు. దీనికి అనుగుణంగానే కేంద్ర ప్రభుత్వ నిర్ణయం ఉండడంతో ఆందోళన వ్యక్తమవుతోంది.