టోల్‌ రూపంలో 9 ఏళ్లలో రూ.9 వేల కోట్ల వసూలు

పెంపు నిర్ణయాన్ని వెనక్కు తీసుకోవాలి
కేంద్ర మంత్రి గడ్కరీకి మంత్రి ప్రశాంత్‌రెడ్డి లేఖ

ఈనాడు, హైదరాబాద్‌: జాతీయ రహదారులపై టోల్‌ ఛార్జీల పెంపుతో తెలంగాణ ప్రజలపై పెనుభారం పడుతుందని, ఆ నిర్ణయాన్ని వెనక్కు తీసుకోవాలని కేంద్ర రవాణా జాతీయ రహదారుల మంత్రి నితిన్‌ గడ్కరీకి రాష్ట్ర రహదారులు-భవనాల శాఖ మంత్రి వేముల ప్రశాంత్‌రెడ్డి బుధవారం బహిరంగ లేఖ రాశారు. ‘‘2014లో తెలంగాణ రాష్ట్రం నుంచి టోల్‌ ఛార్జీల రూపంలో రూ.600 కోట్లు వసూలు చేశారు. ఏటా ఆ ఛార్జీల పెంపుతో ప్రస్తుతం ఆ వసూళ్లు రూ.1824 కోట్లకు చేరాయి. గడిచిన తొమ్మిదేళ్లలో ఈ ఛార్జీల వసూలు 300 శాతం పెంచారు. తెలంగాణ నుంచి రూ.9 వేల కోట్లు వసూలు చేశారు. మరోవైపు గడిచిన తొమ్మిదేళ్లలో రాష్ట్రంలో జాతీయ రహదారుల నిర్మాణానికి చేసిన ఖర్చు రూ.20,350 కోట్లు మాత్రమే. అంటే ఖర్చు చేసిన మొత్తంలో సుమారు సగం సొమ్మును టోల్‌ ఛార్జీల రూపంలో వసూలు చేసినట్లయింది. గత తొమ్మిది ఏళ్లలో పెట్రోల్‌, డీజిల్‌ ధరలు పెంచడంతోపాటు రోడ్‌ సెస్సుల పేరిట కేంద్రం రూ.వేల కోట్లు వసూలు చేసింది. ఆ డబ్బంతా ఎటు పోతుందో ప్రజలకు లెక్క చెప్పాలి. మరోవైపు రాష్ట్రంలో జాతీయ రహదారుల కోసం కేంద్రం రూ.లక్షల కోట్లు ఖర్చు చేసిందంటూ భాజపా నాయకులు పదేపదే అబద్ధాలు ప్రచారం చేస్తున్నారు’ అని లేఖలో ప్రశాంత్‌రెడ్డి పేర్కొన్నారు.