Maldives row: బాయ్‌కాట్ ట్రెండ్ వేళ.. చైనా పర్యటనలో మాల్దీవుల అధ్యక్షుడు

మాలే: ప్రధాని మోదీ(Modi) ఇటీవల లక్షద్వీప్‌లో పర్యటించడంపై మాల్దీవుల(Maldives) నేతలు చేసిన వ్యాఖ్యలు వివాదాస్పదమయ్యాయి. ఈ సమయంలో ఆ దేశ అధ్యక్షుడు మొహ్మద్ మయిజ్జు( Mohamed Muizzu) చైనా(China) పర్యటనకు వెళ్లారు. తన సతీమణితో కలిసి ఆదివారం రాత్రి పయనమయ్యారు. చైనా అధ్యక్షుడు షీ జిన్‌పింగ్‌(Xi Jinping) ఆహ్వానం మేరకే ఈ ఐదురోజుల అధికారిక పర్యటన జరుగుతోంది.

భారత్‌తో దౌత్యపరమైన వివాదం నెలకొన్న తరుణంలో ఈ పర్యటన జరుగుతుండటం గమనార్హం. మయిజ్జు కొద్దినెలల క్రితమే అధ్యక్ష బాధ్యతలు స్వీకరించారు. ఆయనకు చైనాకు అనుకూలమైన వ్యక్తిగా పేరుంది. తన మొదటి విదేశీ పర్యటనలో భాగంగా డ్రాగన్‌కు వెళ్లారు. ఈ క్రమంలో ఇరుదేశాల అధినేతలు పలు అంశాలపై చర్చలు జరిపి, పలు రంగాల్లో సహకారం కోసం సంతకాలు చేయనున్నారు.  ద్వీపదేశంలో సందర్శకుల సంఖ్యను పెంచడం ఈ పర్యటన లక్ష్యమని విశ్లేషణలు వెలువడుతున్నాయి.

‘లక్షద్వీప్‌తో మాల్దీవులకు సమస్య ఏంటీ: ఎంపీ’

మాల్దీవుల(Maldives) మంత్రులు చేసిన వ్యాఖ్యలపై భారత్‌ నుంచి తీవ్ర వ్యతిరేకత వ్యక్తమైంది. దాంతో అక్కడి ప్రభుత్వం నష్ట నివారణ చర్యలు చేపట్టింది. ఆ మంత్రుల్ని సస్పెండ్ చేసింది. ఇక్కడితో శాంతించని నెటిజన్లు.. బాయ్‌కాట్ మాల్దీవులు హ్యాష్‌ట్యాగ్‌తో ఆగ్రహం వ్యక్తం చేస్తున్నారు. ఈ ప్రచారం తమ ఆర్థిక వ్యవస్థపై ప్రభావం చూపుతుందని అక్కడి నేతలు ఆందోళన వ్యక్తం చేస్తున్నారు. ఈ వివాదాన్ని త్వరితగతిన ముగించేలా చర్యలు తీసుకోవాలని తమ ప్రభుత్వానికి సూచిస్తున్నారు.