Israel: ఇజ్రాయెల్‌-అమెరికా మధ్య అభిప్రాయభేదాలు..!

వాషింగ్టన్‌: చిరకాల మిత్రదేశాలైన అమెరికా, ఇజ్రాయెల్‌ (Israel) మధ్య అభిప్రాయభేదాలు తలెత్తాయి. హమాస్‌ నియంత్రణలోని గాజా నుంచి బలగాలను వెనక్కి తీసుకోవడానికి ఇదే సరైన సమయమంటూ చేసిన అగ్రరాజ్య సూచనను ఇజ్రాయెల్‌ తిరస్కరించింది. స్వతంత్ర పాలస్తీనా ఏర్పాటు ప్రతిపాదననూ వ్యతిరేకించింది. ఈ విషయాన్ని నేరుగా అమెరికాకు తెలియజేసినట్లు ఆ దేశ ప్రధానమంత్రి బెంజమిన్‌ నెతన్యాహు (Benjamin Netanyahu) గురువారం ప్రకటించారు.

మరోవైపు ఇజ్రాయెల్‌ తీరుపై అమెరికా (USA) తీవ్ర అసంతృప్తి వ్యక్తం చేసింది. నెతన్యాహు ప్రకటనను తాము భిన్నాభిప్రాయంగా పరిగణిస్తున్నామని వైట్‌ హౌస్‌లోని జాతీయ భద్రతా విభాగం అధికార ప్రతినిధి జాన్‌ కిర్బీ అన్నారు. స్వతంత్ర పాలస్తీనావైపు అడుగులు పడే వరకు ఇజ్రాయెల్‌ (Israel) భద్రతకు హామీ లభించదని అమెరికా విదేశాంగ మంత్రి ఆంటోనీ బ్లింకెన్‌ బుధవారం అన్నారు. రెండు దేశాల ఏర్పాటే ఈ సమస్యకు సరైన పరిష్కారమని అభిప్రాయపడ్డారు. ‘గాజాలో ఇజ్రాయెల్‌ సేనలు దాడుల తీవ్రతను తగ్గించడానికి ఇదే సరైన సమయం’ అని గత వారం వైట్‌ హౌస్‌ ఓ ప్రకటనలో తెలిపింది.

హౌతీలపై ప్రతీకార దాడులు కొనసాగుతాయ్‌: బైడెన్‌

ఈ ప్రకటనల అనంతరం నెతన్యాహు (Benjamin Netanyahu) గురువారం మీడియాతో మాట్లాడారు. హమాస్‌ మిలిటెంట్లను అంతమొందించి బందీలను విడిపించే వరకు గాజాలో యుద్ధం ఆగదని స్పష్టం చేశారు. సంపూర్ణ విజయం సాధించే వరకు వెనక్కి తగ్గమని తేల్చిచెప్పారు. ఇజ్రాయెల్‌పై దాడులకు స్వతంత్ర పాలస్తీనా కేంద్రంగా మారుతుందని ఆందోళన వ్యక్తం చేశారు. జోర్డాన్‌ నదికి పశ్చిమాన ఉన్న ప్రాంతం మొత్తంపై తమ నియంత్రణ ఉండాల్సిందేనన్నారు.