చలికాలంలో ఎర్రని మందార పూల టీ తాగడం వల్ల శరీరంలో వేడి పుట్టడంతోపాటు రోగనిరోధకశక్తీ పెరుగుతుంది. బరువు కూడా తగ్గుతారని ఇప్పటికే ఎన్నో అధ్యయనాలు చెబుతున్నాయి. అయితే తాజాగా మందార టీ చేసే మేలులో మరొకటి చేరింది అంటున్నారు దక్షిణ కొరియాలోని పొహంగ్‌ యూనివర్సిటీ ఆఫ్‌ సైన్స్‌ అండ్‌ టెక్నాలజీకి చెందిన నిపుణులు. రోజూ ఓ కప్పు మందార పూల టీ తాగితే ఆల్జీమర్స్‌నీ అడ్డుకోవచ్చట. ఇందులోని గాసీపెటిన్‌ అనే పదార్థం మతిమరుపునకు కారణమైన అమిలాయిడ్‌ ప్రొటీన్‌ పేరుకోకుండా చూస్తుందట. ఈ విషయాన్ని ఎలుకల్లో ప్రయోగ పూర్వకంగా పరిశీలించి మరీ స్పష్టీకరిస్తున్నారు. పైగా గాసీ పెటిన్‌ సాయంతో మతిమరపునకు కారణమైన అమిలాయిడ్‌ ప్రొటీన్‌ నిల్వల్ని తొలగించవచ్చనీ, తద్వారా ఆల్జీమర్స్‌ చికిత్సకీ ఎంతో ఉపయోగపడుతుందనీ చెబుతున్నారు.