చెంగుచెంగున పరుగులు తీసే జింక పిల్లను చూస్తే భలే ముద్దొస్తుంది. మన ఉనికిని గమనించగానే పారిపోయే ఆ జింకల్ని దగ్గర్నుంచి చూడటమూ, సరదాగా వాటితో ఫొటోలు దిగడమూ అనేది అసలు కుదిరే పని కాదు. కానీ జపాన్‌లోని నారా నగరంలో అది సాధ్యమే. పన్నెండువందల ఎకరాల్లో జింకల కోసమే ప్రత్యేకంగా ఏర్పాటు చేసిన పార్కులో అవి హాయిగా విహరిస్తూ ఉంటాయి. ఈ ప్రాంతానికే చెందిన సికా జాతి జింకల్ని పవిత్ర దేవదూతలుగా కొలుస్తారు ఇక్కడి ప్రజలు. 1637 వరకూ వాటిని హింసిస్తే మరణశిక్ష కూడా విధించేవారట. అంతలా ఆరాధించే ఈ జింకల సంరక్షణ కోసం చేసిన ఏర్పాట్లలో ఈ పార్కు ఒకటి. పచ్చని చెట్లతో పాటూ ఈ ఉద్యానవనంలో మ్యూజియాలూ, దుకాణాలూ, హోటళ్లూ... ఇలా చాలానే ఉంటాయి. వాటన్నింటి మధ్య పర్యటకులతో కలిసి ఎంచక్కా తిరుగుతుంటాయీ జింకలన్నీ. సందర్శకులు కూడా వాటికి ఆహారం తినిపిస్తూ కాసేపు వాటితో సరదాగా ఫొటోలు దిగుతూ ముచ్చటపడిపోతుంటారు.